Në një konferencë për shtyp sot në Tiranë zëvendëskryeministri malazez tha se edhe pse për këtë çështje nuk ka akoma një konsensus të plotë, shumica është e mendimit që Tuzit t’i jepet statusi i tij i veçantë.
Elona Memushi
Zëvendëskryeministri malazez, njëkohësisht dhe Ministër i Punëve të Jashtme dhe Integrimit Evropian, Igor Luksiç deklaroi se qeveria malazeze vijon përpjekjet për dhënien e statusit të komunës për Tuzin. Në një konferencë të përbashkët për shtyp sot në Tiranë me homologun shqiptar Ditmir Bushati, Luksiç tha se edhe pse për këtë çështje nuk ka akoma një konsensus të plotë, shumica është e mendimit që Tuzit t’i jepet statusi i tij I veçantë.
“Propozimi do t’i çohet bashkisë, ndërkohë që ne po punojmë në këtë drejtim, dhe është shumë e rëndësishme të theksohet se ka një mbështetje për këtë devizë të përgjithshme në lidhje me statusin e Tuzit. Ideja është që Tuzit t’i jepet buxheti i vet, të ketë të ardhura të tjera, të ketë një pjesë të të ardhurave nga zonat bregdetare. Është e rëndësishme të theksohet se ky model mbështetet nga shumica dhe është një model i cili mendojmë se do të realizohet”, tha Luksiç.
Zv/kryeministri malazez bëri me dije se është rënë dakort me palën shqiptare të shihet mundësia e e rritjes së numrit të pikave kufitare mes vendeve në të ardhmen për kalimin e mallrave dhe njerëzve.
Shqiptarët e Tuzit kërkojnë që të kenë të drejta të plota dhe të merret statusi i një komune të veçantë. Tuzi ndan Shqipërinë nga Mali i Zi dhe ndodhet në qendër të këtij të fundit. Ai është i banuar nga shqiptarë etnikë dhe aktualisht ka statusin e një komune urbane, brenda qytetit të Podgoricës./illyriapress/
