Ndërprerjet e kota të seancës konstituive të Kuvendit të Komunës së Ulqinit nga një pakicë në Kuvendin e Komunës së Ulqinit janë në fakt lëvizjet e fundit të një politike që përhapte korrupsionin gjithandej, e cila ishte garanci e mos zhvillimit të qytetit, e cila ishte kumbarë e një objekti të shëmtuar në qytetin e vjetër dhe e cila shkatërroi gjithë ekonominë turistike, thuhet në një kumtesë për opinion e Forcës së Re Demokratike.
Ky grup politik nuk pati guximin të votonte Ligjin për Kthimin e Pronave në Valdanos si shenjë katarsisi apo ndërgjegjësimi për padrejtësinë që u kanë bërë pronarëve dhe ekonomisë së qytetit tash 20 vite. Ata sot paraqiten si rojtarë të ligjshmërisë dhe legjitimitetit, ndaj lexojnë nenet e ligjit për të gjetur mbështetje për veprimet e tyre këto ditëve të fundit, vazhdon kumtesa.
Kështu edhe atëherë kërkonin baza ligjore për falimentimin e kompanive si Riviera e Ulqinit dhe Kriporja, të cilat ishin baza e zhvillimit tonë dhe që i shkatërruan. Ndërkohë që opinioni bombardohej me kumtesa, administrata po përpiqej të ndryshonte pyllin e Nikshiqit për ullinjte në Valdanos. Fatkeqësisht, lista e shembujve të tillë është e gjatë. Çdo njoftim i tyre, interpretim i ligjit, Statutit të Komunës dhe Rregullores së Kuvendit të Komunës së Ulqinit në fakt janë dëshmi dhe vërtetim se Forca ka zgjedhur rrugën e duhur dhe bashkëpunëtorët e duhur për herë të dytë brenda një viti. Ranë maskat dhe nuk ka kthim prapa. Humbësit kanë të drejtë të zemërohen, por jo aq shumë!, përfundon kumtesa për opinion e Forcës së Re Demokratike.
