E vetmja gjë e mirë pas zgjedhjeve lokale të 4 shkurtit në Ulqin ishte vota e qytetarëve të Ulqinit të cilët edhe përkundër mangësive të subjekteve politile shqiptare, i votuan ato. Po përfundojmë dekadën e tretë të sistemit shumëpartiak në Mal të Zi dhe votuesi shqiptar i Ulqinit po qendron i palëkundur me votën e tij.
Tema rreth subjekteve politike shqiptare në Ulqin dhe në Mal të Zi në tërësi do të ishte temë në vehte dhe do të meritonte një analizë të posaçme.
Tema aktuale në Ulqin ka të bëjë me formimin e shumicës qeverisëse në këtë qytet. Në kushte normale kjo gjë, duke shikuar numrat e subjekteve politike shqiptare, do të ishte një rutinë dhe punë më së shumti dyjavore. Njohësit e raporteve në mes subjekteve politike shqiptare, nëse vazhdohet pa ndonjë intervenin ”anësor”, janë të mendimit se çdo gjë varet nga partia DPS e Millo Gjukanoviqit dhe mënyra se si ato do ti qasen zgjidhjes së kësaj çështjeje. Edhe pse DPS nuk i ka numrat, ata janë komod të zgjedhin aleatet në mesin e subjekteve shqiptare për më shumë edhe të jenë prijës.
Para zgjedhjeve lokale në Komunën e Tuzit temë u bë ndihmesa e Tiranës zyrtare për unifikimin e faktorit politik atje por që një gjë e tillë dështoi në mënyrën më të keqe. Tendenca për ndihme nuk ndihmoi as që edhe të zbutet retorika në mes subjekteve politike shqiptare, për mos ma keq ajo u përshkallëzua në mase të madhe.
Duke e ditur afërsinë e të gjitha subjekteve politike shqiptare me DPS-in e Gjukanoviqit, në rastin e Ulqinit as që mendohet që Tirana apo Prishtina do të bëjnë përpjekje për ndonjë koordinim të veprimeve në mes këtyre subjekteve. Ata me të drejtë mund të kenë frikë në dështim i cili do të ju jepte imazh të keq para vet elektoratit shqiptar por edhe më gjërë. Subjektet politike shqiptare në Mal të Zi kanë takime të shpeshta me udhëheqësit më të lartë të Shqipërisë dhe Kosovës por që e gjitha kjo krijohet përshtypja më shumë bëhet për konsum paraelektoral se sa përmbajtësor dhe nga të cilat takime do të dukeshin rezultatet në teren.
Komuna e Ulqinit prej fillimit të shumëpartiakësisë është udhëhequr nga kuadrot e subjekteve politike shqiptare por që pas zgjedhjeve të fundit kjo rregull e pashkruar mund të ndryshojë dhe për këtë gjasat janë të mëdha.
