Popujt pakicë dhe komunitetet e tjera kombëtare pakicë në Mal të Zi përbëjnë një burim jashtëzakonisht të rëndësishëm në politikat integruese – u konstatua në takimin ndërmjet ministrit të të drejtave të njeriut dhe të pakicave, Fatmir Gjeka, dhe drejtorit të Fondit për mbrojtjen dhe realizimin e të drejtave të pakicave në Mal të Zi, Xhenis Nurkoviq. U theksua se korniza institucionale e mbrojtjes dhe avancimit të të drejtave të tyre është po aq e rëndësishme sa ajo ligjore dhe strategjike.
Ministri Gjeka theksoi rëndësinë e kornizës normative dhe strategjike për mbrojtjen dhe avancimin e të drejtave të popujve pakicë dhe komuniteteve të tjera kombëtare pakicë. Ministria vitin e kaluar i ka propozuar Qeverisë për miratim dokumentin e ri kombëtar Strategjia e politikës për pakicat 2024–2028, së bashku me Planin e Veprimit përkatës. Nëpërmjet një qasjeje gjithëpërfshirëse në fushat e arsimit, punësimit, kulturës, pjesëmarrjes politike dhe përfaqësimit medial, aktivitetet e planifikuara në planin e veprimit synojnë forcimin e integrimit të komuniteteve pakicë dhe promovimin e tolerancës ndëretnike.
Me qëllim të përmirësimit të mëtejshëm të kornizës për mbrojtjen e të drejtave të pakicave, Ministria ka identifikuar nevojën për ndryshimin e aktit ligjor aktual dhe, në këtë kuadër, e ka përfshirë atë në Programin e anëtarësimit të Malit të Zi në Bashkimin Evropian, me synimin që të avancojë zgjidhjen ligjore ekzistuese dhe ta harmonizojë me standardet evropiane.
Drejtori Nurković i shprehu mirënjohje ministrit për mundësinë e shkëmbimit të mendimeve rreth modeleve për avancimin e pozitës së popujve pakicë dhe komuniteteve të tjera kombëtare pakicë. Ai e informoi ministrin mbi rezultatet e Fondit gjatë periudhës së kaluar, sfidat me të cilat përballet institucioni dhe planet për periudhën e ardhshme.
Ai theksoi se mbrojtja institucionale e të drejtave ka rëndësi të madhe për përfaqësuesit e popujve pakicë. Fondi për mbrojtjen dhe realizimin e të drejtave të pakicave të Malit të Zi është themeluar për të mbështetur aktivitetet që kanë rëndësi për ruajtjen dhe zhvillimin e veçorive kombëtare dhe etnike të popujve pakicë dhe komuniteteve të tjera kombëtare pakicë dhe anëtarëve të tyre në fushën e identitetit kombëtar, etnik, kulturor, gjuhësor dhe fetar. “Në këtë drejtim, do të përpiqem ta justifikoj besimin e dhënë dhe qëllimin e kësaj institucioni”, tha Nurkoviq.
Mbrojtja e të drejtave të popujve pakicë dhe komuniteteve të tjera kombëtare pakicë është një nga shtyllat themelore të shoqërisë malazeze dhe e procesit të integrimit evropian, por po aq e rëndësishme është që të gjithë aktorët relevantë në shoqëri të kontribuojnë për të njëjtin qëllim. Pakicat kombëtare ndihen të integruara në shoqërinë malazeze, gjë që përbën një arritje të madhe për Malin e Zi. Kjo tregon për synimin e tyre për të kontribuar në zhvillimin e vendit, për të mbështetur proceset e integrimit dhe kapacitetin demokratik të tij. E gjithë kjo nuk do të ishte e mundur pa mirëkuptimin e ndërsjellë, respektimin e vlerave themelore dhe vlerësimin e diversitetit – u përfundua në takim.
