Në organizim të Shoqatës së diabetikëve “ Rrethi i kaltër, Ulqin në ambientetet e Fondit Humanitar “Trojet tona” u mbajt takimi me diabetikët e këtij qyteti. Në praninë e shumë njerëzve të sëmurë nga sheqeri dr. Rajmojd Gjonaj mbajti një ligjëratë, në të cilën i informoi të pranishmit me të gjitha komplikimet e kësaj sëmurje, si pasojë e moskontrollimit të rregulltë të nivelit të sheqerit në gjak dhe i udhëzoi që të vizitojnë rregullisht specialistin endokrinolog dhe t’u përmbahen rekomandimeve të mjekut.
Me këtë rast u ndanë aparata, llanceta dhe vitamina të ndryshme . Kryetarja e Shoqatës, Veneranda Gjonaj falënderoi Komunën e Ulqinit, e cila e mbështeti financiarisht këtë projekt dhe Fondin Humanitar “Trojet tona”, i cili siguroi falas ambientet e tyre për mbajtjen e këtij aktiviteti.
“Takimet e këtilla vjetore janë të rëndësishme dhe të domosdoshme për diabetikët, sepse përmes ligjëratave mbi diabetin, jo vetëm se diabetikët marrin informacione të duhura për këtë sëmundje, por edhe vetëdijësohen, shoqërohen, shkëmbejnë përvoajt me njëri-tjetrin. Po ashtu ndarja falas e ilaçeve të cilat u duhen atyre dhe nuk kanë mundësi finaciare t’i blejnë është sadopak një lehëtësim për ta”, tha Gjonaj.
