Një numër i madh qytetarësh të Ulqinit, numri i të cilëve mund të ketë qenë rreth 2500 veta, kanë marrë pjesë në një protestë masive, kundër asaj që ata e konsiderojnë si “shitjen e Ulqinit”. Protesta është organizuar nga Komuna e Ulqinit, e cila kundërshton vendimin e qeverisë malazeze për dhënien e një pjese të bregdetit për investitorët arabë, duke theksuar se nuk janë përfshirë në procesin e vendimmarrjes dhe konsultimeve, shkruan Ulqini Online.
Qytetarët dhe përfaqësues të të gjitha forcave politike shprehën qartë kundërshtimin e tyre ndaj vendimit të qeverisë malazeze për dhënien me qira të Plazhit të Madh. Mbledhja solemne e Kuvendit Komunal u mbajt përpara qytetarëve, në shenjë kundërshtimi ndaj dhënies me qira të bregdetit për 99 vjet.
Kryetari i Komunës së Genci Nimanbegu vlerësoi se Ulqini po përballet me sfidën më të madhe në histori.
“Dikush kërkon të na tjetërsojë pronën dhe t’ia japë një investitori për 90 vjet. Ne nuk e lejojmë këtë,” tha Nimanbegu.
Ai tha se vendimi që mori për të mbajtur një protestë në vend të festës, Ditës së Ulqinit, ishte i detyruar sepse qyteti nuk ka qenë kurrë më i kërcënuar në histori.
“Dhe prandaj ky tubim është vetëm një shembull se si do të mbrojmë atë që na takon, atë që na lanë të parët tanë, çfarë duhet t’ua lëmë brezave tanë. Ne do ta mbrojmë këtë qytet sado që të na kushtojë”, tha Nimanbegu.
Në tubim folën edhe përfaqësues të partive tjera politike që veprojnë në Ulqin dhe tonet dhe mesazhet ishin të njëjtë.
