“Postmodernizmi i ka çuar në periferi traditën, familjen, besimin. Dhe duke i çuar në periferi, ka zhdukur dallimin midis së vërtetës dhe së pavërtetës, midis mitit dhe realitetit, një kufi që ne nuk dimë më se kujt t’i referohemi, sepse bota nuk është më ajo që shohim, por ajo na sugjerojnë”, ka thënë studiuesi, kritiku letrar dhe gazetari nga Tirana, Agim Baçi, në takimin e hapur me temë “Efektet e leximit në ndërgjegjësimin kombëtar e social” që është mbajtur të shtunën mbrëma në Librarinë “Ulqini”.
Ai ka thënë se “është vështirë kur gjërat fundamentale, gjërat që ne i kemi trashëguar shkojnë në periferi”.
Sipas tij, kur vihet në pikëpyetje familja, besimi, pa dyshim që vihet në pikëpyetje edhe çështja kombëtare, edhe raportet që kanë të bëjnë me identitetin tonë.
“Në momentin që vihet në pikëpyetje identiteti ynë, ne jemi të paqartë t’u përgjigjemi disa pyetjeve fundamentale: Pse ia vlen të rrosh? Pse ia vlen të vdesësh? Çfarë është jeta? Çfarë është vdekja? Pse urren? Pse na duan?”, ka thënë Baçi.
Ai ka theksuar se “në ditët e sotme kur bota e spektaklit dominon komunikimin tonë, janë vënë në pikëpyetje gjërat të cilat ne i kemi marrë si të mirëqena nga kohërat”.
Baçi ka folur për shumë çështje të tjera identitare dhe rreziqe që e shqetësojnë shoqërinë e sotme, me theks të posaçëm në shoqërinë shqiptare.
“Kjo (identiteti) është një betejë e përhershme, sepse ku do të mbështetesh ti për ta ruajtur këtë gjë?! Dhe pse është e rëndësishme ta ruash?! A ka kuptim që ta dorëzojmë këtë armë dhe të themi që ne jemi kozmopolitë, i përkasim gjithë botës?! Pyetja është se cilët jemi ne nëse nuk e dimë se kujt i përkasim”, ka pyetur ai.
Baçi i është referuar Matei Kalineskut, njërit prej kritikëve më të mëdhenj të modernizmit dhe postmodernizmit, i cili thotë se dy institucione janë më të rrezikuara në botën e sotme, në botën e spektaklit: biblioteka dhe muzeu, e shkuara dhe imagjinata.
Ai po ashtu i është referuar shkrimtarit të njohur Borges, sipas të cilit nga të gjitha shpikjet e njeriut, libri është më interesanti.
“Teleskopi thotë është zgjatim i vështrimit, telefoni është zgjatim i zërit, parmenda dhe shpata janë zgjatim i krahut, vetëm libri është zgjatim i imagjinatës dhe i kujtesës”, ka thënë studiuesi.
Baçi ka nënvizuar rëndësinë e gjuhës, si një vlerë e veçantë që na dallon nga të tjerët.
Ai ka theksuar se njeriu është qenie kulturore, ndaj edhe ata që tentojnë ta ndryshojnë njeriun, tentojnë ta ndryshojnë kulturalisht dhe gjuha është ajo që preket e para.
“Gjuha, sepse për të ndryshuar një mendim duhet të ndryshosh gjuhën fillimisht”, ka thënë ai.
Baçi është përgjigjur edhe në pyetjet e publikut lidhur me temën.
Udhëheqësi i takimit, Bledar Doda, ka treguar edhe qëllimin e tij duke thënë se kanë menduar që Libraria “Ulqini” të mos jetë vetëm vend për shitblerjen e librave, por edhe ku do të flitet për problematika dhe tema të ndryshme që lidhen me librin, leximin, dijen etj.
Takimi është organizuar nga Këshilli Kombëtar i Shqiptarëve në Malin e Zi. /i. k. Koha Javore/
