Në kuadër të përpjekjeve për një listë të përbashkët të subjekeve politike shqiptar në Mal të Zi, me kërkesë të organizatave shqiptare në SHBA, për dy netë me radhë u mbajtën takime në platformën online Zoom. Në këto takime virtuale ishin të ftuar kryetarët e subjekteve shqiptare në Malin e Zi dhe kryetarët e shoqatave në SHBA, shkruan Ulqini Online.
Tema e takimit kishte të bënte në lidhje me përpjekjet për formimin e një liste zgjedhore të subjekteve shqiptare për zgjedhjet e 30 gushtit 2020.
Në lidhje me mbarëvajtjen e takimeve, nëpërmjet profilit të tij në rrjetin social fb kryetari i shoqatës “Malësia e madhe” nga SHBA-Michigan, Ruzhdi Gjokaj, nga posti i tij ka lënë të mësohet se nuk është arritur një marrëveshje e shumëdëshirueshme.
”Nga katedralja e quajtur Diasporë del tymi i zi!”, ka shkruar z. Gjokaj.
Më poshtë në pyetje të qytetarëve se ”A u shpërnda tubimi pa marrëveshje dhe pa mbledhje te reja te caktuara?”, z. Gjokaj jep përgjigje pohuese duke konfirmuar se nuk u arrit marrëveshja.
Deri në këto momente nuk ka njoftime tjera nga pjesmarrësit e takimit online.
