Ministri i të Drejtave të Njeriut dhe të Pakicave, Fatmir Gjeka, deklaroi se për një rishqyrtim të mundshëm të statusit të Hashim Thaçit si qytetar nderi i Ulqinit duhet të vendoset vetëm pas përfundimit përfundimtar të procesit gjyqësor në Hagë.
“Unë i jam përgjigjur kësaj pyetjeje edhe më herët. Presim rezultatin përfundimtar të procesit gjyqësor. E dimë se bëhet fjalë për një vendim të shkallës së parë dhe se procesi ende nuk ka përfunduar”, deklaroi Gjeka gjatë pjesëmarrjes së tij në emisionin „Të jemi vigjilentë“ në Televizionin e Malit të Zi.
Ai shtoi se, pas vendimit përfundimtar të gjykatës, të gjithë do të duhet të përcaktohen në përputhje me atë vendim.
“Natyrisht, në përputhje me këtë, duhet të përcaktohemi edhe ne, edhe të tjerët, pa marrë parasysh që jemi shqiptarë apo jo. Gjithmonë them se duhet pritur deri në fund rezultati i procesit gjyqësor, pas shqyrtimit të ankesës dhe procedurave të tjera që parashikohen”, tha Gjeka.
