“Faleminderit kryetar, refuzojmë ftesën tuaj” – Reagim i Forumit rinor të UDSH-së ndaj Gjekës

FORUMI RINOR I UDSH-së: REAGIM

Fakti që kryetari i Komunës së Ulqinit e gjeti veten në kumtesën tonë, edhe pse në të nuk u përmend as me emër dhe as me funksion, që për herë të parë reagon në pohimet e thëna, si dhe që mendon se kjo kumtesë është e shkruar nga ana e kryetarit të UDSH-së, tregon që përmbajtja e saj është cilësore, e vërtet dhe që me të kemi qëlluar thelbin.

Qëllimi jonë ishte të nxisim qeverisjen më të ndërgjegjshme të Komunës së Ulqinit nga ana e kryetarit dhe bashkëpunëtorëve të tij. Por, për fat të keq, duke u bazuar në reagimin e tij, ai edhe një herë dëshmoi se është i pandryshueshëm dhe i pandreqshëm.

Zotëri Kryetar, thatë që jeni munduar, me mundësitë që keni, t’i ndihmoni të gjithë klubet sportive. Ne ju themi, kështu dhe në këtë mënyrë mos u mundoni ma! Sikur parat të cilat i shpenzuat në financimin e klubeve fiktive, të cilët askund dhe asnjëherë nuk ishin pjesëmarrës të garave sportive, t’i kishit shpenzuar në financimin e futbollit, Ulqini sot do të kishte klubin e vet në ligën e dytë. Po ashtu, sikur parat e ndara për klubet e Podgoricës, ti kishit shpenzuar, për shembull, për përkrahjen e klubeve të karatesë, ndoshta sot Ulqini prapë do të ishte i stolisur me medaljet nga kampionatet ballkanike, evropiane dhe botërore.

Nuk duhet të jesh ekspert financiar që të dish se alokimet i njeh Ligji, por duhesh të jesh ekspert që të dish se në atë rast duhet të respektohen, në mënyrë rigoroze, rregullat financiare të bazuara në Ligj. Tejkalimi i lejuar i pikës buxhetore mund të jetë deri në 10%, e jo kurrsesi 300% si në rastin tuaj. Alokimet bëhen me rebalancë dhe ato i miraton Kuvendi, e jo kurrsesi me vullnetin tuaj. Mirëpo, Ju qëllimisht zgjodhët që 70.000 euro ti alokoni dhe shpenzoni në kontratat e llojllojshme të shërbimit, vetëm me një qëllim, që Komunën e Ulqinit dhe buxhetin e saj ta vendosni në shërbim të Partisë demokratike dhe këtë institucion ta shndërroni në pengun tuaj partiak.

Na gëzon fakti që delegacioni i lartë nga Turqia dhe bukuroshet shqiptare kanë vizituar Ulqinin. Ajo çfarë na brengos, në mes tjerash, është fakti që vetëm në një restorant janë shpenzuar 10.000 euro për pizza! Jemi të bindur se as përfaqësuesit e delegacionit të lartë turk, as bukuroshet shqiptare dhe as drejtuesit e UDSH-së nuk shijuan as edhe një “kallb” të këtyre pizza-ve. Prandaj, na quani të paditur, por ne nuk e kuptojmë se si të ngrënit tuaj pamasë mund të jetë në të mirë të qytetit.

Blerja e makinave me dyfishin e çmimit nga normalja, si dhe tentimi juaj që të blini makinë luksoze me vlerë 35.000 euro, vendosja e “gjysmës” së Ulqinit në hipotekë, shitja e lokaliteteve më atraktive të qytetit në këste, “lulëzimi” i ndërtimit ilegal (të egër), falsifikimi i pikave buxhetore, dhe shumë e shumë të tjera, karakterizojnë mënyrën tuaj të qeverisjes. Ndoshta definicionin më të mirë për ju e dhanë partnerët tuaj të koalicionit. Derisa njëri ju shpalli të paditur, tjetri ju akuzoi publikisht se për një vit të drejtimit tuaj me NP “Ujësjellës dhe kanalizime” shkaktuat dëme të cilat maten me miliona eurosh.

Prandaj, i nderuari Kryetar, ju falënderojmë për ftesën të cilën me këtë rast na dërguat që të bëhemi pjesë e partisë tuaj. Meqë, përveç tjerash, kuptimi jonë i politikës është tentimi që të luftojmë keqpërdorimet dhe kequdhëheqjen, ne këtë ftesë tuajën duhet ta refuzojmë. Deri tani UDSH-në e udhëhoqën 4 kryetar, do të jetë edhe i pesti, i gjashti…Kemi frikë se ju do të jeni i pari dhe i fundit në PD-në tuaj. Po ashtu, ne si intelektual, siç na vlerësuat ju, nuk mund të pranojmë të jemi pjesë e partisë e cila udhëhiqet nga ngelësit e gjimnazit. Detyra jonë është të mos lejojmë që kjo “mendësi ngelëse” të jetë model i udhëheqjes me Komunë të Ulqinit.

Forumi rinor i UDSH-së