Kryetari i Forcës së Re Demokratike Genci Nimanbegu ka uruar me rastin e Vitit të Ri, urim të cilin mund ta lexoni më poshtë.
Të nderuar bashkëkombës!
Po e përmbyllim vitin 2022 me vazhdimësinë e aktiviteteve dhe nismave të ndërmarra me përgjegjësi dhe përkushtim ndaj komunitetit e qytetit tonë.
Përkundër pengesave në realizimin e programit tonë politik, arritëm të sigurojmë mjete në vlerë mbi 2 milionë euro për realizimin e projektit kryesor për qendrën sportive dhe stadiumin në Ulqin, vazhdimin e fazës së dytë të kalldrëmit në Qytetin e Vjetër- Kalaja, për shpronësimin e tokës për të lidhur dy bulevardet (Gj. K. Skenderbeu dhe Teuta), duke krijuar parakushtet që Ulqini të fitoj dy institucione të reja arsimore (qendrën e inovacionit dhe universitetin). Po çojmë përpara projekte të panumërta në rikonstruksionin e rrugëve dhe objekteve kulturore për ta bërë qytetin tonë qendrë të turizmit në Mesdhe.
Nata e ndërrimit të viteve është moment bashkimi, feste e gëzimi për shëndetin, punën dhe angazhimin tonë gjatë vitit 2022 që po e mbyllim. Duke ju përcjell urimet më të përzemërta në emrin tim dhe në emër të Forcës së Re Demokratike, uroj që viti 2023 të jetë një vit i shëndetshëm, i mbarë dhe i suksesshëm për të gjithë.
Le të shpresojmë e urojmë që viti 2023 të jetë vit i mirëqenies, i angazhimit tonë kolektiv dhe i forcimit të kohezionit politik! Më shumë shpresë, paqe sociale, dhe begati për të gjithë!
Gëzuar!
Kryetar Genci Nimanbegu
