Foto: Facebook / Omer Bajraktari
Faturat e reja për shërbimet e grumbullimit të mbeturinave komunale, të cilat kanë mbërritur ditët e fundit te qytetarët e Ulqinit, kanë nxitur reagime të forta nga përfaqësuesit e Lëvizjes URA. Ish-kryetari i Komunës së Ulqinit, Omer Bajraktari, dhe këshilltari komunal Arian Murati pretendojnë se rritja e çmimeve ka qenë e paralajmëruar më herët dhe se pasojat e saj tashmë po ndihen drejtpërdrejt nga qytetarët.
Përmes një reagimi në rrjetin social Facebook, Omer Bajraktari ka deklaruar se faturat e fundit të lëshuara nga SH.P.K. “Veprimtaritë Komunale Ulqin” konfirmojnë shqetësimet që, sipas tij, ishin ngritur që në momentin e miratimit të çmimores së re.
“Të gjithë jemi dëshmitarë, këto ditë, të faturave jashtëzakonisht të larta që kemi marrë për shërbimet e grumbullimit të mbeturinave komunale nga SH.P.K. ‘Veprimtaritë Komunale Ulqin’. Ne kemi paralajmëruar me kohë për pasojat e miratimit të kësaj çmimoreje të turpshme”, ka shkruar Bajraktari.
Ai theksoi se këshilltari i URA-s në Kuvendin Komunal, Arian Murati, kishte argumentuar gjatë seancës së Kuvendit se çmimorja e re do të përbënte barrë të rëndë financiare për qytetarët.
Sipas Bajraktarit, Klubi i Këshilltarëve të URA-s do të ndërmarrë hapa konkretë institucionalë për ta kundërshtuar vendimin.
“Të hënën do të paraqesim propozim për plotësimin e rendit të ditës së seancës së Kuvendit Komunal, me kërkesën që çmimorja e re të shfuqizohet dhe faturimi të vazhdojë sipas çmimores së vjetër, deri në gjetjen e një metodologjie tjetër, më të drejtë dhe më të arsyeshme për përcaktimin e çmimeve të reja”, thuhet në reagimin e tij.
Bajraktari shtoi se qytetarët nuk duhet të mbajnë barrën e vendimeve që, sipas tij, janë rezultat i interesave politike.
“Ulqini nuk është arkë partiake e askujt dhe qytetarët nuk janë të detyruar të paguajnë faturën e paaftësisë së të tjerëve dhe të interesave politike. Ne do të vazhdojmë të jemi në mbrojtje të interesit të qytetarëve dhe do të kërkojmë që çdo vendim që prek drejtpërdrejt xhepin e tyre të jetë i drejtë, transparent dhe i arsyeshëm”, është shprehur ai.
Murati: Paralajmërova për rritjen prej 60 për qind
Pak ditë para reagimit të Bajraktarit, edhe këshilltari i URA-s, Arian Murati, kishte reaguar në Facebook lidhur me vendimin për rritjen e çmimeve të shërbimeve komunale, të miratuar në seancën e Kuvendit Komunal të Ulqinit më 14 maj 2026.
Murati deklaroi se ishte i vetmi këshilltar opozitar i pranishëm në sallë dhe i vetmi që foli hapur kundër shtrenjtimit të shërbimeve komunale.
“Kam paralajmëruar për një rritje prej saktësisht 60 për qind të çmimeve për personat fizikë dhe, duke krahasuar çmimoren me ato të komunave të tjera, kam treguar se në pothuajse të gjitha kategoritë do të paguajmë më shumë edhe se qytetarët e Podgoricës”, ka shkruar Murati.
Ai vlerësoi se shumica kuvendare injoroi paralajmërimet e tij dhe votoi pro vendimit.
“Njëri paralajmëronte – shumica vendoste. Njëri ishte kundër – shumica votoi pro. Sot pasojat e atij vendimi po i ndjejnë qytetarët”, u shpreh ai.
Sipas Muratit, ajo që dikur dukej si një vendim administrativ tani po reflektohet drejtpërdrejt në buxhetet familjare.
“Atëherë ishte një vendim në letër. Sot ai vendim ndodhet në portofolin tuaj”, përfundoi Murati.
Çështja pritet të diskutohet në Kuvendin Komunal
Me paralajmërimin e URA-s se do të kërkojë shfuqizimin e çmimores së re dhe rikthimin e përkohshëm të tarifave të vjetra, çështja e faturave për grumbullimin e mbeturinave pritet të jetë ndër temat kryesore në seancat e ardhshme të Kuvendit Komunal të Ulqinit.
Mbetet të shihet nëse shumica kuvendare do të pranojë kërkesën për rishqyrtimin e vendimit, ndërsa pakënaqësia e qytetarëve lidhur me faturat e reja vazhdon të jetë një nga temat më të diskutuara në opinionin publik lokal.
