Shazi Nimanbegu për shumë vjet jeton në Kalanë e lashtë të Ulqinit së bashku me familjen e tij 5-anëtarëshe.
Jetën në Kala nuk e kanë aspak të lehtë ai dhe rreth 70 banorët e tjerë që jetojnë brenda mureve të saj. Ata përballen çdo ditë me vështirësi, me mungesë të transportit, me furnizim ushqimesh dhe gjëra të tjera elementare për jetesë.
Nimanbegu, pa marrë parasysh vështirësitë, ka edhe një restorant si më i vjetri në Kala.
Në të përgatiten pjatat më të shijshme të peshkut edhe ushqimet e tjera tradicionale e edhe ato të detit.
Nimanbegu thotë që për ta pajisur restorantin dhe shtëpinë me produkte, ai dhe anëtarët e familjes së tij duhet të bartin me duar të gjithë artikujt.
Por, pavarësisht kësaj, ai thotë se e bën me shumë dashuri dhe se asnjëherë nuk ka menduar që ta lërë jetesën në Kala, pasi thotë se gjyshërit e tij ishin ulqinakët e parë të ardhur këtu.
Ai thotë se më herët sezoni në Ulqin ishte shumë fitimprurës, kurse tani sytë i kanë nga kosovarët.
Kalaja karakterizohet me rrugicat e pjerrëta dhe të gjata, të cilat e bëjnë edhe më të vështirë ngjitjen atje.
Shtëpitë në Kala janë shumë të vjetra, por disa nga to janë restauruar pas shkatërrimit nga tërmeti i vitit 1979, kurse disa të tjera janë rrënuar tërësisht.
Rreth 46 vjet më parë një tërmet i fuqishëm e kishte goditur qytetin e Ulqinit, si dhe kishte shkatërruar edhe një pjesë të Kalasë e cila sot e asaj dite nuk është rinovuar. /KohaNet/
