Sot në ambientet e SOS telefonit për femra dhe fëmijë viktima të dhunës –Ulqin u mbajt konferencë për media ,që ishte aktiviteti i radhës të organizatës në fjalë që po realizon gjatë fushatës “16 ditë aktivizëm kundër dhunës ndaj femrave”.
Drejtoresha e SOS telefonit Hatixhe Nelaj foli për punën e tyre 23 vjeçare, gjendjen aktuale kurë është në pyetje dhuna në familje , pengesat me të cilat ballafaqohen , po ashtu u prezantuan edhe rezultatet e anketës : “Hulumtimi mbi qëndrimet e të rinjve në lidhje me dhunën dixhitale në kontekstin e dhunës me bazë gjinore” që realizohet në kuadër të projektit. Parandalimi i gjuhës së urrejtjes dhe dhunës dixhitale me bazë gjinore ndaj grave përmes fuqizimit të të rinjve” të financuar nga Ministria për të drejtat e Njeriut dhe Pakicave.
“Ajo që e karakterizon situatën në këtë komunë është kujdesi i pamjaftueshëm i institucioneve përkatëse për kategoritë, veçanërisht vulnerabël si gratë, fëmijët dhe të moshuarit, viktima të dhunës në familje. Përveç SOS telefonit , nuk ka qendra krizash apo ndihmë këshilluese, psikologjike apo juridike për personat që përjetojnë dhunë ” u shpreh Nelaj
Sipas Z. Nelaj problematikat me të cilat ballafaqohen janë të shumta, por ajo veçoi mungesën e një strehimoreje, që siç u shpreh ajo është më se e nevojshme në komunën tonë.
” Sigurimi i një strehimoreje do të na lehtësonte shumë jo vetëm punën e SOS telefonit, por pikësëpari të policisë dhe Qendrës për Punë Sociale, e aq më shumë të viktimave të dhunës ”u shpreh Nelaj.
“Rol të rëndësishëm në ndërgjegjësimin e popullatës pa dyshim që luajnë mediat. Raportimi i ndjeshëm i këtij argumenti kaq delikat nga mediat e shkruara apo elektronike, mund të sjellë ndryshime shumë domethënëse në ndërgjegjësimin e komunitetit tonë rreth dhunës në familje, shkaqeve që e sjellin atë dhe pasojave tragjike të saj” shtoi Nelaj .
Ajo, tha se situata e rëndë ekonomike ka sjellë edhe çrregullime të tjera në familje.
“Ajo çfarë e karakterizon këtë vit janë rastet e dhunës në familje nga fëmijët e vet, pra dhuna që kanë ushtruar djemtë ndaj baballarëve dhe nënave të veta. Kjo është tejet shqetësuese ku në një rreth siç është qyteti jonë ku familja konsiderohet gjë e shenjtë, ku akoma mbizotëron patriarkalizmi ,dhe prindërit kanë një autoritet ndaj fëmijëve, ballafaqohemi edhe me një tjetër dukuri tejet të papranueshme dhe të shëmtuar”
Të gjithë së bashku duhet kontribuar që të krijojmë një botë ku çdo grua trajtohet me respekt dhe dinjitet, ku çdo djalë dhe vajzë të edukohet tё respektojë barazinë , ku çdo familje ka shpresë për një tё ardhme tё qëndrueshme dhe tё fort, përfundoi Nelaj.
DHUNA NUK TOLEROHET, AJO RAPORTOHET! NESE VIKTIMA DETYROHET TE HESHTË, KOMUNITETI SHOQEROR NUK DETYROHET!
