Nuk e kemi ndërmend të polemizojmë me vullnetin zgjedhor të qytetarëve. Vullneti zgjedhor i tyre ka qenë i tillë dhe ne do ta respektojmë atë dhe për vazhdimin e politikës sonë njësoj të pasionuar do të luftojmë edhe si opozitë, kështka deklaruar kryetari i PDS dhe presidenti i Malit të Zi Millo Gjukanoviq në një intervistë të tij për ORF, transmeton Ulqini Online.
Ai ka theksuar se nëse koalicioni i cili ka shënuar fitore arrin të formojë Qeverinë e re, partia e tij njësoj do të luftojë edhe nga opozita ashtu siç ka vepruar edhe në periudhën e kaluar pra për një politikë të shtetit qytetarë dhe për ruajtjen dhe forcimin e harmonisë shumë etnike në Mal të Zi.
Duke u përgjigjur në pyetjen nëse partia në krye të së cilës gjendet ka shans të formojë qeverinë në periudhën e ardhshme, Gjukanovqi ka theksuar se tanimë janë të njohura rezultatet jo zyrtare të zgjedhjeve të cilat PDS i ka pranuar dhe ua ka uruar konkurrentëve të vetë. Besojmë se rezultatet preliminare do të jenë edhe rezultate zyrtare dhe kështu mandatet do të jenë të ndara, 41 mandate për koalicionin tre anëtarësh, i cili deri tani ishte opozitë , kurse PDS me partnerët e vetë të koalicionit do të ketë 40 mandate, ka theksuar Gjukanoviq.
Duke folur për bashkëpunimin me Qeverinë e re nga pozita e presidentit të shtetit, Gjukanoviq ka theksuar se është i sigurt se çdo gjë do të funksionojë në pajtim me kushtetutën e shtetit.
