Mediat kosovare kanë pasqyruar me tituj bombastik lajmin kinse shqiptaret në Mal të Zi do të garojnë në zgjedhjet e ardhsme me listë të përbashkët zgjedhore.
Kështu, portali gazetaexpress.com raporton lajmin nga kumtesa e Partisë Demokratike me titullin ”Shqiptarët me listë të përbashkët zgjedhore në Mal të Zi”.
Pak a shumë ngjashëm raporton edhe portali KohaNet ku lajmin për këtë ”bashkim” e titullon ”Bashkim i shqiptarëve në Mal të Zi – Hajdinaga në krye të listës zgjedhore”.
Të gjithë ato që i përcjellin rrjedhat politike në Mal të Zi e dinë se nga bashkimi i shqiptarëve në një listë zgjedhore nuk është as për afërmi realitetit.
Subjektet politike shqiptare në Mal të Zi në zgjedhjet e ardhshme pritet se do të dalin më së paku dy lista zgjedhore, me shumë gjasa tri ose katër, duke parë zhvillimet e fundit politike dhe polemikat e ashpëra të tyre në mes veti.
Por si ndoshta kurrë më parë, sujektet shqiptare në këto zgjedhje do të kenë edhe një garë të llojit të vet: kush më afër DPS-it, partisë në pushtet.
