Kosova dhe Mali i Zi – 100 mijë hektarë tokë ndërkufitare pa dokumente

Prej tyre mbi 12 mijë hektarë janë të Kosovës, por kanë mbetur andej kufirit

Kosova dhe Mali i Zi nuk kanë dokumente kadastrale të vlefshme për reth 100 mijë hektarë tokë në brezin kufitar ndërmjet këtyre dy shteteve, prej të cilave mbi 12 mijë hektarë janë të Kosovës, por që me Marrëveshjen për Demarkacionin e kufirit me Malin e Zi kanë mbetur andej kufirit.

Këtë e kanë konfirmuar për “Zërin” ekspertë të kësaj çështjeje, sipas të cilëve, Komisioni kosovar për Demarkacionin ka vendosur që t’ia besojë komisionit malazez definimin e vijës kufitare, ndërsa nuk ka kërkuar dokumente nga ta që e vërtetojnë se këta 10 mijë hektarë i takojnë Malit të Zi.

Një gjë e tillë vërtetohet edhe nga raporti e Komisionit për dokumentacionin e trajtuar për përcaktimin e kufirit Kosovë – Mali i Zi, ku thuhet se në takimin e datës 07.11.2012 komisionet e këtyre dy shteteve janë dakorduar që Mali i Zi të definojë vijën kufitare.