Foto: predsjednik.me
PRESIDENTI I MALIT TË ZI MILATOVIQ VIZITOI SHKOLLAT NË ULQIN: ÇDO FËMIJË DUHET TË KETË SHANSE TË BARABARTA PËR TË PASUR SUKSES
Presidenti i Malit të Zi, Jakov Milatoviq, vizitoi sot institucionet arsimore në Ulqin, ku bisedoi me nxënësit, mësimdhënësit dhe drejtuesit e shkollave për arsimin, idetë e tyre, planet për të ardhmen dhe mundësitë që të rinjtë presin nga komuniteti lokal dhe shteti, shkruan faqja e presidentit te Malit të Zi, transmeton Ulqini Online.
Në Shkollën Fillore “Bosko Strugar”, presidentin e priti drejtoresha e shkollës, Spasa Ashkrabiq Gjuroviq. Gjatë vizitës ai u njoh me projektet e shumta të nxënësve, punën e seksioneve dhe punëtorive, rezultatet në gara, si dhe mënyrat se si nxënësit ndërthurin teknologjitë moderne, kreativitetin dhe aftësitë tradicionale. Vëmendje të veçantë tërhoqi demonstrimi i funksionimit të një roboti, ndërsa vizita ishte gjithashtu një mundësi për shoqërim të drejtpërdrejtë me nxënësit, përfshirë edhe një ndeshje ping-pongu mes presidentit Milatoviq dhe njërit prej nxënësve.
Në Shkollën Fillore “Marshal Tito”, presidentin e priti drejtoresha Ferida Hajdinaga. Pas takimeve me nxënësit e klasës së parë dhe të gjashtë, Milatoviq bisedoi edhe me nxënësit e klasës së nëntë për vazhdimin e shkollimit, orientimin profesional dhe planet e tyre për të ardhmen.
Gjatë bisedës u diskutua se si të rinjtë e shohin të ardhmen e tyre, çfarë mundësish presin nga komuniteti lokal dhe shteti, por edhe për rëndësinë e njohurive, energjisë dhe talenteve të tyre për zhvillimin e mëtejshëm të Malit të Zi.
“Gjëja më e rëndësishme që një shtet mund të bëjë për të ardhmen e tij është të investojë në fëmijët e vet. Kur në shkolla shohim dije, kreativitet, sipërmarrje dhe teknologji të reja, bëhet e qartë sa potencial ka Mali i Zi. Detyrimi ynë është t’i mundësojmë çdo fëmije arsim cilësor dhe mundësi të barabarta për sukses”, deklaroi Milatoviq.
Presidenti theksoi se vendi ku dikush lind nuk duhet të përcaktojë mundësitë që do të ketë në jetë.
“Nga Ulqini deri në veri të Malit të Zi, çdo fëmijë duhet të ketë shanse të barabarta. Duhet të ndërtojmë një shoqëri ku dija, talenti dhe puna të njihen dhe të shpërblehen, dhe ku të rinjtë do të kenë arsye ta ndërtojnë të ardhmen e tyre pikërisht në Mal të Zi”, tha presidenti.
Në Shkollën e Mesme të Përzier “Vëllazërim – bashkim”, presidenti u takua me drejtoreshën Snezhana Zhivanoviq, pas së cilës u organizua aktiviteti “Ora me Presidentin”. Nxënësit e klasave të treta dhe të katërta patën mundësinë të bisedonin me kreun e shtetit për arsimin, shoqërinë, rrugën evropiane të Malit të Zi, pritshmëritë e tyre dhe mundësitë që u ofron shteti.
Milatoviq vlerësoi se investimi në arsim duhet të jetë një nga prioritetet më të rëndësishme të politikave shtetërore dhe lokale, sepse pikërisht në shkolla krijohen njohuritë, vlerat dhe aftësitë mbi të cilat do të mbështetet zhvillimi i ardhshëm i Malit të Zi.
“Ulqini ka të rinj të talentuar dhe ambiciozë, të cilët kanë çfarë të tregojnë dhe meritojnë mundësinë që idetë e tyre t’i kthejnë në sukses. Nuk mjafton t’u themi të rinjve të qëndrojnë në Mal të Zi. Duhet t’u japim arsye për të qëndruar: arsim cilësor, mundësi të barabarta dhe një shoqëri ku përpjekja dhe dijet e tyre vlerësohen”, përfundoi presidenti.
Gjatë vizitës në shkolla, presidenti u shoqërua nga kryetari i Komunës së Ulqinit, Genci Nimanbegu, dhe bashkëpunëtorët e tij.
