Otrant Olimpik pret kampionët në ndeshjen e parë në shtëpi
Pas muajsh pritjeje dhe sfidash në fushat e tjera si nikoqir, Klubi Futbollistik Otrant Olimpik më në fund do të luajë ndeshjen e parë të sezonit në shtëpi, këtë të dielë, në stadiumin e rinovuar në Ulqin. Ky moment i shumëpritur shënon një kthesë të rëndësishme për klubin, që aktualisht ndodhet në fund të tabelës dhe lufton për mbijetesë në elitën e futbollit malazez, shkruan Ulqini Online.
Atmosfera në qytetin e Ulqinit është e ndezur. Shikuesit dhe sportadashesit mezi presin të mbushin tribunat për të përkrahur ekipin e tyre në përballjen e vështirë kundër kampionëve në fuqi të Malit të Zi, të cilët janë edhe favoritët për titullin e këtij sezoni.
Stadiumi në Ulqin është përgatitur plotësisht për të mirëpritur këtë ndeshje të rëndësishme. Rregullimet infrastrukturore tashmë kanë përfunduar dhe kushtet janë optimale për lojë, çka pritet të ndikojë pozitivisht në moralin e skuadrës.
Pavarësisht pozitës së vështirë në tabelë, skuadra ulqinake është e motivuar. Lojtarët janë të vetëdijshëm për peshën e kësaj ndeshjeje dhe për mundësinë që ajo paraqet – jo vetëm për të fituar pikë të vlefshme, por edhe për të rikthyer entuziazmin në mesin e tifozëve të vet.
Të dielën, qyteti i Ulqinit nuk do të jetë vetëm një vendpushim bregdetar, por edhe një arenë futbolli e mbushur me emocion, shpresë dhe besim në rikthimin e skuadrës në rrugën e duhur.
Video nga Hajro Vuciqi
