Nën organizim të Shkollës fillore “Bedri Elezaga” në Katërkollë dhe Këshillit Kombëtar Shqiptar në Mal të Zi në ambientet e kësaj shkolle u organizua një program shumë interesant për nder të festës më të madhe të shqiptarëve, Ditës së Flamurit. Është hera e pare që një manifestim i tillë, dedikaura Ditës së Flamurit, organizohet në këtë shkollë.
Programi ishte i konceptuar dhe i gërshetuar shumë bukur dhe thjesht, me recitime dhe kënga nga nxënësit e shkollës si dhe me kumtesa shumë interesante, shkruan Ulqini Online.
Fjalët hyrëse dhe përshëndetëse u mbajtën nga kryetari i Këshillit Kombëtar të Shqiptarëve z. Faik Nika si dhe drejtori Shkollën fillore ’’Bedri Elezaga’’ z.Mustafë Bardhi.
Kumtesa shumë interesante dhe të dobishme kishin përgaditur autor të njohur të letrave shqipe në Mal të Zi por edhe mësimdhënës të shkollës.
Dr. Nail Dragës për këtë aktivitet kishte përgaditur temë rreth përdorimit të flamurit shqiptar deri në ditën e pavarësisë së Shqipërisë.
Në temën tjetër të përgaditur nga z.Hajrullah Hajdari “Dita e Flamurit Kombëtar” foli për disa momente shumë interesante dhe të padëgjuara më parë.
Kumtesë interesante kishte përgaditur edhe mësimdhënësi e kësaj shkolle Endrit Cuca që kishte të bënte me librave shkollore nga lënda e historisë me theks të veçantë të pasqyrimit të historisë së popullit tonë në këto tekste. Mësimdhënsja Ardita Muça foli për rëndësinë që autorët shqiptarë ndër vite i dhanë flamurit kombetar në punimet e tyre.
Kumtesa e fundit por jo më pak interesante ishte ajo e Mr. Ali Bardhi me titullin “Përdorimi i flamurit kombëtar sipas dokumenteve të periudhës osmane”.
Me një pikë të veçantë u pareqit edhe aktori nga Struga, z. Xhevat Limani.
Mysafirët e shumtë, prindërit, mësimdhënësit dhe nxënësit e shkollës u emocionuan pa masë me prezantimin e nëxënësve të kësaj shkolle me recitime të shkëlqyera. Poashtu, nën drejtimin e mësimdhënësit Ardit Nika, nxënësit kishin përgaditur edhe pika muzikore që i shkonin kësaj mbrëmjeje..
Në fund të organizimit, udhëheqësja e programit, Arjeta Kurti, falenderoi pjesmarrësit dhe uroi për këtë festë të madhe të shqiptarëve.
