Ilustrim: Nga aktivitetet e mëparshme
Shoqata e Diabetikëve “Rrethi i Kaltër”, Ulqin organizon takim me diabetikët e Komunës së Ulqinit. Ky aktivitet i përvitshëm ka për qëllim shoqërimin, informimin, këshillimin , ndërgjegjësimin dhe ndihmesën simbolike të personave që janë diagnostikuar me diabet.
“Me këtë rast do të ketë aktivitete, si: matja e nivelit të sheqerit në gjak për të gjithë qytetarët e interesuar, shpërndarja e aparateve, shiritave, lançetave dhe vitaminave për diabetikët.
Po ashtu do të shpërndahen edhe materiale edukativo-shëndetësore, kurse Shoqata do të ndajë mirënjohje familjes Kurmemaj, nga Shtetet e Bashkuara të Amerikës, në shenjë falënderimi për përkrahjen dhe mbështetjen financiare të personave të prekur nga sëmundja e sheqerit të Komunës së Ulqinit”, thotë kryetarja e Shoqatës, Veneranda Gjonaj . Ajo thekson se ky projekt realizohet me mbështetjen financiare të Komunës së Ulqinit.
Aktiviteti do të mbahet në Shkollën e Muzikës në Ulqin, ditën e premte, më 25 tetor 2024, në ora 15.
