Nga Beqir SINA
Dhjetëra shqiptar u mblodhën në sheshin “Dag Hammarskjold Plaza” para ndërtesës së OKB-së, duke ndezur qirinj dhe kanë vendosur lule në kujtim të Afrim Bunjakut
Ishin shqiptarët që punojnë dhe jetojnë në Shtetet e Bashkuara të Amerikës, pjestar të këtij komuniteti ata që zhvilluan këtë martë homazhe në nderim Afrim Bunjakut, efektivit të policisë së Kosovës, që humbi jetën gjatë sulmit terrorist ndaj rajonit të policisë në Leposaviq të Kosovës.
I pranishëm në këto homazhe ishte dhe ambasadori i Kosovës Blerim Reka, – Konsulli i Përgjithshëm në New York, së bashku me diplomatët e tjer të kësaj zyre diplomatike, si dhe Ambasadori i Shqipërisë në Misionin e Përhershëm të Republikës së Shqipërisë në OKB, , Ambasador Ferit Hoxha dhe z/vendës Ambasadoria Albana Dautllari .
Po ashtu edhe Kryetari Këshillit Koordinues të Diasporës zoti Mark Gjonaj, së bashku me disa udhëheqës të shoqatave dhe organizatave, përfaqësues të medias, activist të komunitetit nga zona e Tri-Shteshit.
Ky homazh u sponsorizua nga Këshilli Shqiptaro Amerikan në New Jersey.
Gjatë ndezjes së qirijeve dhe vendosjes e luleve disa nga pjesëmarrësit në homazhe mbanin edhe flamurin e Shqipërisë dhe Kosovës, si dhe fotografit e policit të vrarë Afrim Bunjaku, me anëtarët e familjes së tij. Në njërën anë të posterit, ku ndizeshin qirinjë dhe vendoseshin lule, ishte vendosur edhe busti i Heroit tonë Kombëtar Gjergji – Kastrioti Skënderbeu.
Ambasadori Reka, Konsulli i Përgjithshëm i Republikës së Kosovës në New York, shkruajti në statusin e tij në Facebook se : “Sot me bashkëatdhetarët tanë të Nju Jorkut, dhe me ambasadorin e Shqipërisë në OKB, Ferit Hoxha, bëmë homazhin për heroin Afrim Bunjaku, i cili u vra nga terroristët serb deri sa ishte në detyrë dhe në mbrojtje të atdheut.
Duke ndezur një qiri në ceremoninë e sotme të vigjilencës, Djellza Pulatani, e cila është Themeluese e organizatës “The F’Oda Summit”, një nismë për fuqizimin e vajzave, e cila filloi në fillim të këtij viti në Kosovë, tha: “Sulmi ndaj çdo shqiptari është sulm ndaj të gjithëve. Ne duhet të bashkohemi për t’u solidarizuar kundër një dhune të tillë dhe për të dënuar veprimet e terroristëve serbë.”
Homazhi në kujtim të policit të vrarë Afrim Bunjaku u mbyll me një minut heshtje.
Kujtojmë se 25 shtatori ishte ditë zie shtetërore në Kosovë në nderim të policit të vrarë, Afrim Bunjaku, ndërsa presidentja e Kosovës, Vjosa Osmani, e ka shpallur “Hero të Kosovës” policin e rënë gjatë detyrës.
Në Banjskë të Zveçanit nga sulmet ndaj njësiteve policore kosovare në orët e para të 24 shtatorit mbeti i vrarë polici Afrim Bunjaku, ndërkaq nga aksioni i policisë së Kosovës u vranë 4 terrorist sërb.
