Sejdi Astafa me familjen e tij kujdeset për fermën me 70 dele dhe 20 lopë
Nga Gjekë Gjonaj
Numri i kopeve të bagëtive në zonën e Anës së Malit vazhdimisht ulet për shumë arsye. Me gjithë problemet e shumta me të cilat përballen çdo ditë bujqit dhe blegtorët e kësaj zonë , me mbijetesën e fermave të tyre, ende ka të tillë, ndonëse me numër simbolik, të cilët merren me bujqësi dhe blegtori , të cilat pas turizmit janë degët kryesore ekonomike të Komunës së Ulqinit.
Sejdi Astafa nga fshati Selitë në Anë të Malit , diç më shumë se 2o kilometra larg Ulqinit, ka një fermë me 20 lopë dhe 70 dele. Për fermën e tij kujdeset ai, bashkëshortja dhe tre fëmijët e tij të grupmoshës 13-16 vjeç. Të gjithë janë të angazhuar dhe të aftësuar për profesionin e bujkut dhe të blegtorit. Secili nga ata pa përtesë shtatë ditë të javës kryejnë punën e vet në fermë, pa asnjë ditë pushim që nga orët e hershme të mëngjesit e deri në mbrëmje vonë. Punë në fermë ka shumë, sepse siç pohon fermeri i suksesshëm Astafa, kultivimi i kopeve të dhenve dhe lopëve qumështore kërkon kujdes të veçantë e të vazhdueshëm dhe punë e mundim jashtëzakonisht të madh. Në fermën e tij ka mish dhe qumësht. Familja Astafa prodhon pak më shumë se 200 litra qumësht në ditë , apo 6 deri në 7 mijë litra qumësht në muaj.
Nuk prodhon kos, djath e gjizë, por qumështin ia shet Qumështores “ Srna” nga Nikshiqi, e cila çdo ditë bën grumbullimin e qumështit dhe pagesën e rregullt në fund të muajit. Blerja e produkteve të tij blegtorale është e siguruar, por ai me të drejtë ankohet në rritjen e çmimeve të karburanteve , ushqimit të kafshëve dhe pjesëve të tjera të nevojshme për mbarëvajtjen e fermës.
“Me çmimet aktuale mezi mund të mbijetojmë. Qumështi është shtrenjtuar pak muajt e fundit ,por ende nuk mbulon shpenzimet e koncentrateve, Karburanti është gjithashtu i shtrenjtë”, thotë Astafa. Nuk ka prodhim të suksesshëm në industrinë e qumështit nëse nuk prodhohet edhe foragjere, prandaj ai prodhon rreth dy hektarë misër dhe rreth 3 hektarë tërfil.
Sipas fjalëve të tij, mbështetjen më të madhe e ka nga Ministria e Bujqësisë së Malit të Zi, e cila për çdo vit i ndihmon dhe i stimulon fermerët përmes subvencioneve të ndryshme. Ajo çka paraqet vështirësi për të gjithë fermerët që aplikojnë përmes ministrisë përkatëse për mjete nga fondet e ndryshme shtetërore e evropiane , pohon Astafa, është procedura administrative e cila do të duhej dukshëm të lehtësohej.
Ky fermer punëtor veçmas është i zhgënjyer në Komunën e Ulqinit, e cila , siç shprehet ai, nuk i mbështet fermerët ulqinakë pothuaj aspak me vite të tëra, për dallim nga komunat e tjera në Mal të Zi. Edhe pse klima në zonën e Anës së Malit është e butë, ushqimi për kafshë duhet të sigurohet për dimër, kështu që Astafa ka përgatitur më shumë se 4 mijë dënga me sanë për fermën e vet.
Këtë vjeshtë, ai kultivoi disa hektarë tokë. “Nuk është e lehtë, sidomos kur kostot e prodhimit po rriten, por duhet të punosh në fshat, thotë Astafa.
