Nga Gjekë Gjonaj
Viti i ri shkollor në Shkollën Fillore “ Bedri Elezaga” në Katërkollë nisi sot mbarë në kushtet e kufizimeve prej pandemisë-me maska, matje temperature , dezinfektim duarsh dhe mjedisesh, me orë të shkurtuara mësimore prej 30 minutash e rekomandime të tjera mbrojtëse të autoriteteve shëndetësore e arsimore. Me virusin corona ende në qarkullim për 44 nxënës fillestarë u organizua një pritje e veçantë, e cila me siguri do t’u lënë mbresa të pashlyera në jetën e tyre shkollore. Ata të veshur bukur e të buzëqeshur u mirëpritën duar hapur nga mësimdhënësit e shkollës në një atmosferë festive e të gëzueshme dhe në një ambient të bukur shumëngjyrësh. Moment i posaçëm mbresëlënës për ta dhe gjest i bukur simbolik gjithsesi ishte veprimi simbolik i ndarjes për herë të parë të fletë mirëseardhjeve në shkollë.
Ushtruesi i detyrës së drejtorit, të shkollës, Mustafë Bardhi, thotë se janë bërë të gjitha përgatitjet për mbarëvajtjen e mësimit në kushte të pandemisë dhe se viti shkollor filloi mbarë e pa problem.
“Sa i përket shkollës sonë, e cila sivjet numëron 394 nxënës , çdo gjë ka filluar me kohë, mbarë, dhe nuk kemi pasur telashe më në fund as teknike. Shkolla është e përgatitur mjaft, kemi hapësirë të mjaftueshme, në fakt punojmë me dy ndërrime. Turni i paraditës po shkon shumë në rregull. Nxënësit janë këtu. Temperaturën ua kemi matur dhe të gjithë e kishin të përshtatshme për shkollë. Mësimi po shkon me rregull dhe kështu do të jetë edhe në ndërrimin e dytë. Brenga jonë është që t’i ruajmë të gjithë fëmijët të mos infektohen gjatë qëndrimit në shkollë. Ndërkohë që katër mësimdhënës munguan sot nga procesi mësimor për shkak se kohë më parë kanë rezultuar pozitiv me këtë virus. Tre nga ata janë në izolim , kurse tjetri ndodhet në spital. Të gjithë janë zëvendësuar nga kolegët e tyre kështu që nxënësit do të vijojnë normalisht mësimin derisa besojmë të shërohen me sukses dhe të rikthehen sa më parë në shkollë”, pohon Bardhi.
Ai shton se një pjesë e konsiderueshme e nxënësve veç janë pajisur me tekste shkollore falas të cilat sivjet ua ka siguruar Qeveria , ndërsa të tjerët do të furnizohen gjatë ditës së nesërme. I pyetur se a janë të përgatitur për mësimin në distancë, në rast se përkeqësohet situata epidemiologjike Bardhi u përgjigj pozitivisht. “Sinqerisht shpresoj se nuk do të vijë deri tek ajo. Ne jemi të përgatitur edhe për këtë formë mësimdhënieje, pasi kemi përvojë nga periudha e kaluar më se njëvjeçare. Prandaj as mësimi në distancë nuk mund të na befasojë”, shprehet Bardhi.
Urojmë që atmosfera e sotme e punës, entuziazmi i mësimdhënësve dhe buzëqeshjet e nxënësve dhe të prindërve të vazhdojnë deri në mbylljen e këtij viti shkollor me mjaft sfida e të panjohura.
