Shkruan Naser Pajaziti
Misionarët kokëpalarë pa ndjenja kombëtare nuk kanë mundur dhe nuk do të mund të na përdhosin dhe nxinë figurat tona kombëtare. Jemi krenarë që përmes këtyre figurave na njeh bota si popull human, tolerantë dhe shembull i bashkëjetesës fetare si vllazën me tri fe e me një gjuhë e atdhe!
Degjeneruesit pa taban kombëtar e fetar mundohen që sot të na mbajnë leksione përçarje, por i rikujtojmë se ne kemi pasur dhe kemi dijetarët tanë atdhetarë që na kanë shtruar rrugën e drejt të kombëtarizmës dhe fesë.
Ju a rikujtoj disa nga porositë e tyre:
”Ne shqiptarët, prej çdo feje qofshim, jemi tanë vllazën gjaku dhe vllazën vatani . Do të shkojmë mbarë e mi…rë me shoq si jemi tue shkue, do të punojmë së bashku për lulzimin e atëdheut tonë dhe do ta mbrojmë atë me gjakun tonë”
(Hafiz IBRAHIM DALLIU)
“Kristianë e myslimanë janë vëllezër shqiptarë të pandarë.Ta duam njëri-tjetrin, t’i tregojmë botës mbarë se shqiptarët pa dallim feje, janë vëllezër si bij të njëshëm të së dashurës sonë Shqipëri
( Hafiz VEHBI DIBRA )
“Kemi tri fe, por kemi vetëm një Atdhe të përbashkët, një gjak vëllazëror, një gjuhë , një diell e një Zot. Detyrë mbi detyrat kemi bashkimin dhe mbrojtjen e atdheut “.
(Mulla IDRIZ GJILANI )
“Është e vërtetë se ne kemi Bajram e Pashkë, por Shqiptarinë e kemi të përbashkët”.
(At GJERGJ FISHTA)
“ Ndarjet në besim nuk sollën çarje në mes të shqiptarëve. Gjendjet e besimit, jo vetëm në vendet e lindjes, por edhe në Evropë, e në vendet e ndriçuara me qytetërim, shumë herë kanë nxjerr vrasje të mëdha e të tmerruara; Në Shqipëri, këto grindje nuk ndihen dhe kurrë në këtë vend s`kanë ngjarë. T’ecim të dlirë n’udhë të Perëndisë, n’udhët të drejtësisë…në mes të shqiptarëve të vërtetë s’ka ndonjë ndarje, ndonjë çarje, ndonjë ndryshim! Janë të tërë vëllezër të gjithë: janë një trup, një mendje, një qëllim,një besë”.(SAMI FRASHËRI)
“….megjithëqë elementi mysliman ka shumicën në Shqipëri, nuk besoj të ketë një shtet të qytetëruar, ku të mbretërojë aq tolerancë feje, sa në Shqipëri”. (FAN NOLI)
