Sekretari i përgjithshëm i FBK-së, Leart Hoxha, të dielën, ka treguar se, pos lojtarëve me rrënjë nga Kosova që luajnë në nivel të lartë në Evropë e SHBA, do të kontaktohen edhe tre lojtarë shqiptarë nga Mali i Zi që nuk kanë luajtur në nivel senior për ndonjë vend tjetër dhe për të cilët besohet se mund të luajnë për Kosovën dhe të japin kontribut për të, shkruan sot Koha Ditore.
Hoxha nuk ka përmendur emrat e këtyre lojtarëve, por ka treguar se ata luajnë në Ukrainë, Spanjë e SHBA.
Derisa në SHBA ka disa lojtarë shqiptarë me rrënjë nga Mali i Zi që bëjnë karrierë në basketboll në nivele të ndryshme, në Ukrainë e Spanjë është vetëm nga një i tillë.
Në Ukrainë për skuadrën Hoverla luan Victor Lulgjuraj (Ljuljdjuraj). 26-vjeçari është i gjatë 203 centimetra dhe luan në pozitën alo-qendër.
Ai ka lindur dhe është rritur në SHBA, ndërsa po e luan edicionin e parë si profesionist në Evropë.
Ndërsa sa i përket Spanjës, atje luan vetëm një shqiptar. Emri i tij është Halil Kanaqeviq dhe luan për ekipin e Saragosës, ekip që luan në kategorinë më të lartë të basketbollit spanjoll. Halil Kanaqeviqi është një basketbollist me moshë relativisht të re. Ai ka lindur me 23.10.1991 në Nju Jork. Është me origjinë nga rrethina e Kraja, pikërisht nga Ostrosi. Prindërit e tij kanë emigruar në Amerikë shumë kohë më parë dhe ai ka lindur atje. Pas shkollës së mesme ai shkoi në Universitetin Hofstra dhe u zhvendos më pas në Universitetin e famshëm Shën Jozefit në Filadelfia. Për shkak të rregullave ligës NCAA për kalimin nga një në një universitet tjetër, ai bëri pauzë një vit nga basketbolli. Pas aventurës amerikane Kanaqeviq erdhi ne Europë ku me sukses luajti me ekipet e Romës, Olimpia nga Lubjana dhe se fundmi në Saragosa.
Ky është një lojtar që mund të luajë në pozicione katër dhe pesë. Është i gjatë 204 centimetra.
