NJË ÇEREK SHEKULLI VEPRIMTARI E LD-së

Të gjithë anëtareve të LDnëMZ, si themeluesve të sajë, ashtu edhe atyre që na u bashkëngjiten më vonë, u urojmë 25 vjetorin e lindjes së subjektit të parë politik shqiptar në Mal të Zi. Duke uruar këtë përvjetor dëshirojmë të përkujtojmë të gjithë anëtarët dhe përkrahësit tonë, se Dega e Malësisë, e Plavë-Gucisë dhe e Rozhajës do t’u mbeten besnike parimeve themeltare të LD-së dhe nuk do të bëjnë kompromise të kalbura me askënd. Për këtë arsye, këto tri degë edhe nuk iu bashkëngjiten festimit gjoja “qendror” që e organizon ushtruesi i detyrës së kryetarit, bashkë me 1/4 e partisë, konkretisht vetëm me një degë, atë të Krajës.

Ky vendim i njëanshëm i kryetarit, si edhe refuzimi konstant për të mbajtur mbledhjen e kryesisë apo kuvendin e partisë, u bënë “lëkura që fundos anien”, prandaj ne vendosëm që të mos bëhemi pjesë e imazheve falco të Mehmet Bardhit, por vendosëm që manifestimin me rastin e 25 vjetorit ta bëjmë në Tuz, në lokalet e restorantit Verdi, më 09. 09. 2015, në ora 20:00.

Pa fjalime e porosi pompoze, diktatoriale, ku të gjithë ata që nuk mendojnë si kreu, janë “të kapur” apo ndjekin “interesat personale”, ne vetëm deklarojmë se të kërkosh mbajtjen e mbledhjes së kryesisë së partisë, para festës, apo edhe të kuvendit zgjedhor, nuk është ndonjë mëkat, e aq më pak hile apo tradhti. Mëkat, hile e edhe tradhti e idealeve të cilat na bashkuan para një çerek shekulli, bëjnë ata të cilët nuk respektojnë aktet e partisë së vet, ata që nuk respektojnë bashkëpunëtorët e vet, ata që refuzojnë të mbajnë kuvend zgjedhor për 15 vite, ata që nuk japin llogari financiare për dy dekada. E pastaj i akuzojnë të tjerët për mbrojtje të “interesave të vogla personale”. Natyrisht, sepse në këtë mënyrë duan të mbulojnë interesat e veta, të mëdha. Por dielli nuk zihet me shoshë.

Të nderuar bashkudhëtarë, duke ju uruar këtë çerek shekulli veprimtari, ju ftojmë të ngjeshim radhët dhe të mëkëmbim Lidhjen Demokratike, si subjektin e parë të shqiptarëve në Mal të Zi dhe ta shpëtojmë nga fundosja që po ia përgatisin ata që ishin të paguar, këto 25 vite, për ta ruajtur. Prandaj, ne, nuk do të lejojmë që ushtruesi i detyrës së kryetarit të LDnëMZ të shuaj subjektin, as për interesa e tija të vogla, as të mëdha, e as për interesa të zyrave që skenën politike të shqiptarëve në Mal të Zi, e duan pa Lidhje Demokratike.

LDnëMZ u themelua në Tuz të Malësisë së Madhe dhe këtu, ne tri degët legjitime e legale, do të bëjmë shënimin e këtij jubileu. Gëzuar!

Degët: Malësi, Plavë-Guci dhe Rozhajë