Autoritetet e Kosovës dhe të Malit të Zi kanë nënshkruar të merkurën në Vjenë marrëveshjen për demarkacionin e kufirit.
Ministri i Jashtëm i Kosovës, Hashim Thaçi, dhe ai i Punëve të Brendshme, Skender Hyseni, kanë nënshkruar dokumentin që përcakton kufirin e Kosovës me Malin e Zi.
Nënshkrimi i demarkacionit është konfirmuar edhe nga Qeveria në Podgoricë.
Disa zyrtarë të opozitës në Kosovë kanë kundërshtuar demarkacionin, duke thënë se një pjesë e territorit të Kosovës, pa ndonjë bazë, i ka takuar Malit të Zi.
Ky i fundit ka nënshkruar sot edhe demarkacionin e kufirit me Serbinë. /BS/
Protesta në Pejë: Demarkacioni me Malin e Zi nuk do të riprodhojë paqe
Një grup i banorëve të qytetit të Pejës kanë protestuar sot kundër nënshkrimit të marrëveshjes për demarkacionin me Malin e Zi, duke bllokuar për një orë magjistralen Pejë-Rozhajë.
Organizatori i kësaj proteste, Ali Lajçi, u bëri thirrje udhëheqësve të Republikës së Kosovës që të mos nënshkruajnë asnjë marrëveshje me shtetin e Malit të Zi, pasi që me këtë, sipas tij, Kosova do të humbë rreth 12 mijë hektar tokë.
Lajçi: Marrëveshja është në kundërshtim me interesat e Kosovës
”Sot protestohet, kërkohet nga ministri i Punëve të Jashtme, ministri i Punëve të Brendshme që të mos nënshkruhet në Vjenë marrëveshja e tillë sepse është në kundërshtim me interesat e Republikës së Kosovës, në kundërshtim me territoret hapësinore, turistike, pronësore të kësaj zone në përgjithësi dhe se Kosova humb në këtë rast 12 mijë hektarë bazikë”, tha Lajçi.
Përveç humbjeve në tokë që do t’i sjellë shtetit të Kosovës, sipas Lajçit, kjo marrëveshje do të sjellë edhe jo stabili tet në mes të këtyre dy vendeve. Dhe në rast se nuk do të ndryshohet ndonjë gjë nga ana e Qeverisë së Kosovës, sipas tij do të filloj një kapitull i ri me Malin e Zi.
Lajçi: Nënshkrimi i marrëveshjes nuk do të riprodhojë paqe
“Me Malazezët nuk jemi në konflikte politike e të tjera, por ky kapitull është i papranueshëm. Ata i kemi shtet fqinj dhe ne do të vazhdojmë me mirësi, por në rast se këto çështje synohen zyrtarisht atëherë është një proces një kapitull i ri që ky popull, kjo gjeneratë dhe madje një akumulim historik mund të shpërthejë keq dhe mund të mos jemi të sigurt në marrëdhënie reciproke… Kjo vijë kufitare është vijë e ngatërresave e jostabilitetit, është kufi i cili nuk do të qëndrojë dhe nuk do të riprodhojë paqe, kurse në mes të dy popujve duhet të ketë paqe dhe siguri”, shtoi ai.
Lajçi gjithashtu shtoi se protesta do të ketë edhe në Prishtinë si dhe në pika tjera kufitare deri sa të zbatohet marrëveshja sipas ligjit dhe Kushtetutës së vendit.
Për t’i mbështetur protestuesit i pranishëm ishte edhe kryetari i Kuvendit Komunal të Pejës, Islam Husaj. Ai bëri të ditur së për këtë çështje është mbajtur seancë e jashtëzakonshme ku të pranishëm kanë qenë të gjithë anëtarët e Komisionit Shtetëror të Kufirit.
Sipas Husajt, në atë seancë janë nxjerrë disa konkluzione të cilat Komisioni asnjëherë nuk i ka marrë parasysh.
Ditë me parë, u mbajt edhe një tubim në fshatin Kuçishtë të Rugovës me liderin e AAK-së Ramush Haradinaj për çështjen e demarkacionit të kufirit me Malin e Zi.
Në anën tjetër, përfaqësuesit e komunitetit po mundohen të sigurojnë 10 mijë nënshkrime nga qytetarët për t’ia dërguar Kuvendit të Kosovës kundër ratifikimit të marrëveshjes së kufirit me Malin e Zi./KP
