Në Prishtinë shënohet 18 vjetori i pavarësisë së Malit të Zi me hapjen e ekspozitës retrospektive kushtuar 90-vjetorit të lindjes së artistit Gjelosh Gjokajt – artistit të madh evropian nga Malësia
Për të shënuar 18 vjetorin e pavarësisë së Malit të Zi dhe 90-vjetorin e lindjes së artistit të nderuar Gjelosh Gjokaj nga Mileshi i Malësisë, të mërkurën mbrëma në Prishtinë, Zëvendëskryeministri njëherësh ministri i Zhvillimit Ekonomik në Qeverinë e Malit të Zi, Nik Gjeloshaj e hapi ekspozitën “Rrugëtimi modernist i Gjelosh Gjokaj”.
Në hapjen e ekspozitës në Galerinë Kombëtare të Kosovës të pranishëm ishin edhe Kryetari i të Kuvendit të Republikës së Kosovës, Glauk Konjufca, dhe ministri i Kulturës, Rinisë dhe Sportit, Hajrullah Çeku.
Pas 24 vjetë mungese në kryeqytetin e Kosovës janë ekspozuar përsëri veprat e artistit evropian modernist nga Mileshi i Malësisë, Gjelosh Gjokaj, ku tashmë artdashësit kosovar për afro 1 muaj e gjysmë mund t’i sodisin veprat e këtij artisti që ndryshe njihet edhe si babai i grafikës së Kosovës.
Ekspozita “Rrugëtimi modernesit i Gjelosh Gjokaj” përbëhet nga gjithsej 83 vepra, 75 të siguruara nga familja e tij dhe 18 të tjera që janë pjesë e fondit të Galerisë Kombëtare të Kosovës (GKK), ku edhe janë të ekspozuara.
“Maestro Gjokaj ka qenë, është dhe do të jetë më shumë se sa një artist, kubist, grafist, ai është një urëlidhëse kulturore dhe miqësore ndërmjet dy shteteve tona”, tha gjatë hapjes solemne të eskpozitës, zëvendëskryeministri njëherësh ministri i Zhvillimit Ekonomik në Qeverinë e Malit të Zi, Nik Gjeloshaj duke i përshëndetur liderët institucionalë të Republikës së Kosovës dhe të pranishmit e tjerë nga politika, diplomacia, arti, kultura dhe sporti.
Zëvendëskryeministri i Malit të Zi, Gjeloshaj tha se “me ekspozitën retrospektive kushtuar Gjokajt po ashtu e shënojmë 18 vjetorin e ditës së pavarësisë së Malit Zi”, dhe se shtoi se “jam shumë i nderuar që sonte këtu me ne ndodhen edhe miku im, kryetari i Kuvendit të , Glauk Konjufca, ministri i Kulturës, Rinisë dhe Sportit, Hajrullah Çeku, dhe drejtoresha e Galerisë Kombëtare Alisa Gojani-Berisha e cila ka dhënë kontribut të ҫmueshëm në rikthimin e veprave të Gjelosh Gjokajt para publikut të Kosovës”. Ndërsa Kryetari i Kuvendit të Republikës së Kosovës, Glauk Konjufca deklaroi se “ Kemi të bëjmë me një artist i cili mund të quhet me plot kuptimin e fjalës botëror”.
I ngarkuari me punë në Ambasad[n e Malit të Zi në Prishtinë, Bernard Çobaj falenderoj komunitetin diplomatikë prezent dhe u shpreh se Gjelosh Gjokaj është figurë kyçe kulturore që bashkon dy vendet.
Ekspozita “Rrugëtimi Modernist i Gjelosh Gjokaj“ është organizuar nga Ambasada e Malit të Zi në Kosovë, për nder të shënimit të 18 vjetorit të ditës së pavarësisë së Malit Zi dhe 90 vjetorit të lindjes së piktorit Gjelosh Gjokaj, në bashkëpunim me Galerinë Kombëtare dhe Ministrinë e Kulturës, Sportit dhe Rinisë të Republikës së Kosovës. Ekspozita do të qëndrojë e hapur deri më 7 korrik 2024.
