Nga Gjekë Gjonaj
E dhimbshme, por e vërtetë. Vetëm katër nxënës përfunduan me sukses shkollimin nëntëvjeçar në Shkollën Fillore “ Gjergj Kastrioti-Skënderbeu” në Ostros, Krajë. Drejtori i kësaj shkollë, Beqir Berjashi thotë se sivjet i thanë lamtumirën këtij institucioni edukativo-arsimor katër gjysmëmaturantë. “ Dy prej tyre shkollimin nëntëvjeçar e përfunduan me sukses të shkëlqyeshëm, ndërsa dy të tjerë, Fjorentina Lekperiq dhe Ilmenita Selloviq u shpërblyen me diplomën “ Pishtari”. Me rastin e ndarjes së këtyre shpërblimeve në shkollë u organizua një ceremoni e rastit, në të cilin Fjorentina Lekperiq u shpall nxënëse e gjeneratës. ” Mësimdhënësit dhe drejtuesit e kësaj shkollë ndjehen krenar me suksesin e treguar në mësime të gjysmëmaturantëve , në aktivitete jashtëshkollore, por edhe me sjelljet e tyre të mira për çka do të mbahen në mend për shumë kohë”, thotë Berjashi
Për fitueset e diplomës “ Pishtari ky çmim është rezultat i punës së përkushtuar gjatë nëntë viteve të shkuara. Ato treguan se gjatë shkollimit kanë mësuar shumë dhe se me punë mund të arrihet gjithçka. Ato janë të vetëdijshme edhe për kontributin e jashtëzakonshëm të mësimdhënësve që të jenë të suksesshme në mësime dhe në sjellje.
Katër maturantët e kësaj shkollë, edhe përkundër rrethanave të krijuara nga virusi korona, do të shënojnë në mënyrë solemne natën e gjysmëmaturës. Organizimi i kësaj feste të bukur do të mbahet të mërkurën e ardhshme në restorantin “ Votra” në Ostros.
