Kryetari i Forcës së Re Demokratike menjeherë pas përfundimit zyrtar të orarit të votimit ka dalur me një deklaratë rreth ditës së sotme zgjedhore. Ai në faqen e tij deklason se ”Fatkeqësisht edhe në këtë proces zgjedhor janë hasur parregullsi të ndryshme dhe janë zbuluar përpjekje të shumta për të blerë vota në forma të ndryshme”.
Më poshtë mund të lexoni të plotë shkrimin e Cungut.
Të dashur anëtarë dhe mbështetës të Forcës së Re Demokratike.
Ju faleminderit të gjithëve nga zemra për punën qe keni bërë dhe besimin që na keni dhënë. Fatkeqësisht edhe në këtë proces zgjedhor janë hasur parregullsi të ndryshme dhe janë zbuluar përpjekje të shumta për të blerë vota në forma të ndryshme. Anëtaret tanë do të analizojnë me vëmendje të dhënat e mbledhura për të parë se çfarë përmasash kanë pasur këto manipulime dhe si do të ndikojnë në rezultatin final të zgjedhjeve. FORCA do të vazhdojë të luftojë në të ardhmen për të garantuar procese të lira e të ndershme zgjedhore të standardeve evropiane në Komunën e Ulqinit e nuk do të tolerojë ata që shkelin mbi vullnetin politik të popullit tonë.
Tani e gjithë vëmendja jonë është tek procesi i numërimit ku komisionerët dhe vëzhguesit tanë do të bëjnë maksimumin në mënyrë që çdo votë e juaja të numërohet dhe respektohet. Ne ju jemi përjetë mirënjohës për votën e dhënë dhe ju sigurojmë se mbështetjen tuaj nuk e shohim vetëm si privilegj, por edhe si obligim për të punuar më shumë për të siguruar të ardhmen e popullit tonë në trojet e veta në Mal të Zi.
