Shkruan Gjekë Gjonaj
Dashamirët e kinematografisë të Ulqinit javën që lamë pasë mbushën përplotë sallën e Qendrës Kulturore të këtij qyteti për të parë premierën e filmit për qytetin e tyre. Vlerat historike, turistike dhe trashëgimia kulturore e zonës së Ulqinit u prezantuan nëpërmjet shfaqjes filmike “ Perla e Bunës”, me autorë vëllezërit Millan dhe Millutin Karaxhiq.
Kjo komedi romantike bashkëkohore si synim parësor kishte pikërisht promovimin dhe publikimin e vlerave të përmendura që mbart Ulqini në shërbim të njohjes dhe të informimit të mijëra shikuesve që do ta ndjekin këtë film në Mal të Zi, në shtetet e rjonit dhe më gjerë. Që në minutat e parë fitoi simpatinë e atyre që e panë. Filmi disa herë gjatë shfaqjes u shoqërua me ovacione e duartrokitje të të gjithë njerëzve që ishin ngritur në këmbë në këtë mbrëmje të mrekullueshme, një gjë që ndodhë rrallë në evente të kësaj natyre në Ulqin.
Çdo pjesë e filmit shkëlqeu. Muzika e përzgjedhur me sens. Kuadrot atraktive. Xhirimet interesante, ku spikaten në mënyrën më të bukur të mundshme bukuritë e paprekura natyrore të Malit të Zi, të cilat në radhë të parë vërehen në peizazhet e Adës në Bunë, Plazhit të Madh, Liqenit të Shkodrës dhe Kalasë së Ulqint. I gjithë ky konglomeratë përbën një mozaik të destinacioneve më atraktive të Malit të Zi, të cilat gjthësesi do t’ia ngrisin imazhin shtetit të parë ekologjik si destinacion i bukur turistik në rajon dhe në Evropë.
Veçmas duhet veçuar kuadrot atraktive dhe interpretimet brilante të aktorëve të mirënjohur Minja Karaxhiq, Andrija Millosheviq, Mlladen Neleviq, Sllaven Doshllo, Vanja Nenadiq, Hristina Popoviq, Mira Banjac, Dubravka Rashkiq… Në mesin e tyre edhe sprovat e arritura të tre aktorëve të rinjë nga Ulqini dhe i gjthë stafi tjetër. Ata me humorin e tyre entuziasmuan dhe kënaqën të gjithë publikun, si askushn tjetër para tyre deri në ditët e sotme në Ulqin.
Përmes pamjeve vizive mahnitëse publiku i pranishëm gjatë dy orëve mori si të thuash një terapi shpirtërore, e cila i “qetësoi” nga brengat dhe problemet e ditës. I mbushi me gaz. Me gëzim. Me hare. Me ngacmim. Me energji pozitive Me ndjenja për ta shijuar atë mrekulli që e ka krijuar natyra në bregdetin e Ulqinit.
Kam përshtypjen e plotë se kjo komedi romantike, respektivisht kjo melodramë, është një reklamë e shkëlqyer për Ulqinin, e cila përmes atmosferës, fotografisë , muzikës dhe aktrimit ringjallën frymën e jetës në këtë pjesë të Mesdheut Jugor.
Autorët e këtij filmi, vëllezërit Minja dhe Millan Kraxhiq, krijuan një mundësi të madhe për të treguar se sa e bukur dhe unike është bukuria natyrore e Ulqinit dhe trashëgimia e tij kulturore. Ulqinakët, këtyre artistëve, tashmë adhurues të Ulqinit dhe miq të denjë e të dëshmuar të këtij qyteti, duhet t’u jenë mirënjohës. Mbase askush deri në ditët tona nuk mendoj se ka bërë diçka të ngjashme e me kaq vlerë se sa ata për këtë qytet të lashtë shqiptar. Edhe unë dua t’i falenderoj. Faleminderit shumë!
