Nga Frank Shkreli
Pallati ku dikur qendronte Gjergj Kastrioti Skendërbeu gjatë vizitave të tija në Romë për takimet me papët e Romës, është këthyer tashti në një hotel luksoz, siç mund të shihet edhe nga fasada e re e ndërtesës.
Kur isha në Romë si refugjatë politik më 1970, pasi jetosha aty afër, kalojsha shpesh asaj rruge. Ndërtesa në atë kohë ishte një gërmadhë, por ruante mbi derë fotografinë historike të heroit të kombit shqiptar, aty ku siç mund të shihet edhe në këtë foto, ruhet edhe sot me mbishkrimin: “GEOR CASTRIOTA SCANDERBEG PRINCEPS EPIRI –AD FIDEM ICONIS REST AN DOM MDCCCXLIII”.
Më thonë se hoteli, ndonëse i ri, ka tërhequr menjëherë vemëndjen e turistëve të shumtë në Romë, ku përveç komoditetit që u ofron atyre hoteli SCANDERG, ata njihen edhe me historinë e heroit të shqiptarëve dhe shpëtimtarit të Europës, Gjergj Kastriotit – Skëndërbeu. Krenari!
Të jetojë përgjithmonë kujtimi i tij. Në radhë të parë, ndër shqiptarë!
