Në Kuvendin e Malit të Zi procedohet Propozimi i Rezolutës mbi nevojën që Mali i Zi të bëhet anëtar i NATO-s. Deputetët e Kuvendit të Malit të Zi për këtë dokument do debatojnë në një seancë të jashtëzakonshme gjatë muajit shtator.
Rezolutën e kanë nënshkruar 49 deputetët, ku më së shumti janë nga Partia Demokratike e Socialistëve (DPS), pastaj Partia Socialdemokratike, Partia e Malit të Zi Pozitiv, Partisë Boshnjake kurse në emer të Klubit të Deputetëve që përfaqësojnë shqiptarët në Parlamentin e Malit të Zi ka nënshkruar deputeti Nik Gjeloshaj, trasnmeton RTMZ.
Në projektrezolutën paraqitet qëndrimi se anëtarësimi i Malit të Zi në NATO, është në interes të përgjithshëm të shtetit, të ekonomisë dhe gjithë qytetarëve. Me anëtarësimin në Aleancën Veri-Atlantike, siç thuhet, Mali i Zi bëhet aleat i shteteve më të fuqishme, dhe në këtë mënyrë do të forcohet siguria në rajon.
Përparimi ekonomik, prosperiteti demokratik i shtetit dhe shoqërisë, forcimi i sundimit të ligjit, rritja e sigurisë, lufta më e lehtë por më e suksesshme kundër korrupsionit dhe krimit të organizuar, ekstremizmi fetar dhe kombëtar, si dhe krimi kibernetik, janë cituar si disa nga të mirat e anëtarësimit të Malit të Zi në NATO.
Mali i Zi pret që deri në fund të vitit të marrë ftesën për anëtarësim në NATO. Ndërsa sekretari i përgjithshëm i organizatës Jens Stoltenberg kishte njoftuar më parë në mënyrë të përsëritur se një vendim i tillë do të merret deri në fund të vitit 2015.
