Gjimnazi i Ulqinit organizoi një mbrëmje emocionale homazhi për të nderuar kujtimin e mësuesit të ndjerë Bajram Rexha, një figurë kyçe e arsimit në qytetin tonë. Ky eveniment u zhvillua si pjesë e aktiviteteve për shënimin e 60-vjetorit të themelimit të Gjimnazit të Ulqinit, duke bashkuar të gjithë komunitetin shkollor, ish-nxënës dhe miq të shumtë të shkollës, shkruan Ulqini Online.
Mbrëmja nisi me një përkujtim të ndjerë për mësuesin e ndjerë. Drejtoresha e shkollës Ardita Kovaçi paraprakisht falenderoi të gjithë ata që kontribuan për këtë mbrëmje duke veçuar edhe Fondacionin ‘’Trojet tona’’ i cili ndihmoi materialisht.
Ajo që e bëri këtë ngjarje edhe më të veçantë ishte shfaqja e dramës “Sikur të isha djalë”, një krijim i autorit të njohur Haki Stermilli, e cila u luajt nga nxënësit e Gjimnazit të Ulqinit, duke dhënë një pamje të qartë të pasionit dhe angazhimit të nxënësve të shkollës për artin dhe kulturën.
Shfaqja u zhvillua në ambientet e shkollës, duke bërë kështu që gjithçka të tingëllonte më intime dhe më afër publikut. Drama, e cila trajton tema të thella shoqërore dhe psikologjike, u interpretua me një forcë të jashtëzakonshme nga nxënësit, të cilët i dhanë jetë çdo karakteri me intensitetin e duhur emocional. Regjia e shfaqjes ishte në duar të profesionistës tashmë të dëshmuar Edina Mustafiq Avdiu, e cila me mjeshtëri udhëhoqi këtë projekt dhe solli një interpretim të shkëlqyer të dramës. Skenografija, një pjesë e rëndësishme e krijimit të atmosferës, ishte realizuar nga Jetmira Hoxha, e cila me dizajnin e saj të thjeshtë, por të fuqishëm, kontribuoi në forcimin e mesazhit të shfaqjes.
Publiku ishte i shumtë, duke përfshirë mësues, nxënës, ish-nxënës, intelektualë dhe profesionistë të yot të dalua nga kjo shkollë por si dhe miq të shumtë dhe familjarë të familjes Rexha. Të pranishmit shprehen emocionet dhe mirënjohjen e tyre për mësuesin, i cili ndikoi shumë në formimin e shumë brezave të rinj, dhe për të cilin kjo mbrëmje homazhi ishte një dëshmi e respektit të thellë.
60-vjetori i Gjimnazit të Ulqinit është një ngjarje e madhe për komunitetin dhe arsimin, dhe ky aktivitet, i shoqëruar me dramën e autorit Stermilli, theksoi lidhjen e fortë ndërmjet traditës dhe rinisë. Mësuesi Bajram Rexha mund të mos jetë fizikisht i pranishëm më, por trashëgimia e tij, e mbushur me dashuri për edukimin dhe përkushtim për çdo nxënës, do të jetojë gjithmonë në zemrat e të gjithëve që patën privilegjin ta njihnin.
Fundi i shfaqjes vazhdoi me duartrokitje frenetike për një kohë të gjatë nga të pranishmit duke treguar se mbrëmja me këtë shfaqje ja kishte arritur qëllimin.
