Nga Gjekë Gjonaj
Se fëmijët kanë nevojë çdo ditë për aktivitet fizik, sidomos sot që lojërat e zakonshme fizike janë zëvendësuar nga ato elektroniket që ndikojnë negativisht në shëndetin e tyre, para të gjithëve e kuptuan mërgimtarët anamalas të bashkuar në Fondin Humanitar “ Trojet tona”. Këta njerëz humanistë, duke e ditur rëndësinë dhe ndikimin shumë të madh që ka sporti në mirërritjen dhe në edukimin fizik dhe mendor të fëmijëve, ndihmuan financiarisht formimin e Shkollës së Volejbollit për Femra. Themelimi i kësaj shkollë, më 6 nëntor 2021, me donacione të FH “ Trojet tona” u mirëprit me kënaqësi nga e gjithë popullata vendase, prindërit, fëmijët dhe mësimdhënësit e SHF” Bedri Elezaga” në Katërkollë, e cila ofroi sallën sportive për stërvitje.
Drejtuesit e Shkollës së Volejbollit punuan me vullnet e përkushtim gjatë gjithë vitit të kaluar me rreth 70 vajza të cilat treguan interesim të madh. Çdo fillim është i vështirë, por drejtuesit e kësaj shkolle të volejbollit, duke parë interesimin e vajzave të grupmoshave 2008, 2010 dhe 2012 për t’u marrë me këtë sport, i motivoi që këto vajza të përfitojnë gjatë tërë jetës së tyre nga përvojat që fitojnë gjatë marrjes me sport. Dhe, pas një pune të suksesshme njëvjeçare të trajnerëve të klubit Kadri dhe Herodit Sinani, profesorë të fiskulturës, sivjet u themelua Klubi i Volejbollit për Femra “ Barbana”.
Kryetari i klubit, Valdet Kurti, thotë se më 6 nëntor ka kaluar një vit nga fillimi i projektit të Shkollës së Volejbollit për vajza në Katërkollë-Anë të Malit dhe se në një kohë të shkurtër arritëm ta themelojmë klubin, falë interesimit të madh të vajzave dhe punës së suksesshme e trajnerëve tanë, Kadri dhe Herodit Sinani.” E gjithë kjo mrekulli, siç do ta quaj unë, do të ishte e pamundur pa mbulimin e plotë të të gjitha shpenzimeve nga ana e Fondacionit shqiptaro-amerikan “Trojet tona. Ne i detyrohemi shumë donatorëve të këtij fondacioni, sepse investimi në sport, veçanërisht tek vajzat, ka një dimension më të gjerë. Gjithashtu na ka ndihmuar edhe udhëheqësia e Shkollës fillore “Bedri Elezaga” në Katërkollë, duke na ofruar shfrytëzimin e sallës së shkollës ku mbahen ushtrimet. Këtë vit marrim pjesë në gara të organizuara nga Federata e Volejbollit të Malit të Zi me 3 ekipe të moshave: U14, U12 dhe U10. Ndjesia jonë pas dy javëve të përfunduara dhe sukseseve që duhet të vlerësohen, edhe pse nuk i kemi primare rezultatet, është e papërshkrueshme, ndoshta e njëjtë si edhe e vet vajzave”, shprehet Kurti.
Kënaqësinë e madhe nuk e fsheh trajneri i Klubit të Volejbollit të Femrave “Barbana”, Kadri Sinani. “Jemi shumë të lumtur dhe të kënaqur që po marrim pjesë në kampionatin malazez të volejbollit. Ndeshjet e para i kemi pasur më 30 tetor dhe 6 nëntor. Na befasoi atmosfera fantastike, pritja e mirë dhe shoqërimi i të gjitha ekipeve pjesëmarrëse, si dhe rezultatet e mira. Si ekip i ri, ne nuk kemi ambicie të mëdha. Synimi ynë është të marrim pjesë në këtë kampionat dhe të vazhdojmë garën vitin e ardhshëm. Edhe pse nuk i njohim skuadrat pjesëmarrëse, mendoj se kemi cilësinë për të qëndruar në këtë kampionat”, thotë Sinani.
Vlen të theksohet se buzëqeshjet e vajzave të këtij klubi, miqësitë e sinqerta dhe të reja, puna në grup dhe vendosja e vlerave të sportit që në moshë të re janë të një rëndësie të veçantë.
