Një atmosferë e veçantë kulture dhe krenarie kombëtare mbizotëroi sot në Shkollën Fillore “Bedri Elezaga” në Katërkollë, ku e ftuar ishte znj. Shaqe Dushaj, një nga figurat e përkushtuara në ruajtjen dhe promovimin e trashëgimisë kulturore shqiptare, transmeton Ulqini Online.
Vizita e saj u kthye në një aktivitet me vlera të shumanshme edukative dhe emocionale për nxënësit dhe stafin e shkollës. E njohur për angazhimin e saj shumëvjeçar në promovimin e Xhubletës – veshjes tradicionale të grave të Malësisë së Veriut – znj. Dushaj solli para nxënësve një prezantim të detajuar mbi historinë, simbolikën dhe rëndësinë e kësaj veshjeje unike.
Gjatë aktivitetit, ajo veshi dy nxënëse me Xhubletë, duke e shndërruar sallën e shkollës në një skenë të gjallë tradite. Nxënësit patën mundësinë të njihen nga afër me secilin element të kësaj veshjeje madhështore – nga forma karakteristike me pala në trajtë kambane, te qëndismat me motive të lashta, brezaret, përparëset dhe zbukurimet tradicionale. Çdo detaj, sipas znj. Dushaj, mbart histori shekullore dhe dëshmon për forcën, fisnikërinë dhe qëndrueshmërinë e grave malësore ndër breza.
Në fjalën e saj, ajo theksoi se Xhubleta nuk është thjesht një veshje popullore, por një simbol identiteti dhe kujtese kolektive. E shpallur pasuri e mbrojtur nga UNESCO dhe e përfshirë në Trashëgiminë Kulturore Jomateriale të Njerëzimit, Xhubleta përfaqëson një nga elementet më të rralla dhe më të vjetra të kulturës tradicionale në Ballkan.
Nxënësit e ndoqën me interes të veçantë prezantimin, duke shfaqur kureshtje dhe emocion për trashëgiminë që u përket. Aktiviteti shërbeu jo vetëm si një orë mësimore ndryshe, por si një moment reflektimi mbi rëndësinë e ruajtjes së identitetit kulturor.
Në përfundim të vizitës, drejtuesit e shkollës, në emër të nxënësve dhe stafit, i ndanë znj. Shaqe Dushaj një mirënjohje për kontributin e saj në ruajtjen dhe kultivimin e kulturës kombëtare.
Vizita e saj në Shkollën Fillore “Bedri Elezaga” do të mbetet një kujtim i veçantë për komunitetin shkollor, si një ditë e mbushur me frymëzim, krenari dhe dashuri për traditën shqiptare.
