Dashamirët e librit do të kenë një arsye më shumë për të vizituar Ulqinin këtë verë. Më 27 korrik 2025, në ora 20:00, në ambientet e Tregut të suvenirëve, do të hapet zyrtarisht Edicioni i 24-të i Panairit të Librit – Ulqini 2025, një ngjarje që tashmë është shndërruar në një traditë të çmuar kulturore për qytetin dhe më gjerë, shkruan Ulqini Online.
Siç mësohet nga Kabineti i kryetarit të Komunës së Ulqinit, rreth 50 botues nga mbarë rajoni do të jenë pjesë e këtij edicioni, duke sjellë me vete një gamë të gjerë botimesh dhe autorësh – nga emra të njohur të letërsisë bashkëkohore, deri te autorë të rinj që sapo kanë nisur rrugën e tyre letrare. Panairi pritet të jetë një pikëtakim frymëzues për botues, autorë dhe lexues, ku ide të reja, histori të reja dhe pasione të përbashkëta do të ndërthuren në një atmosferë të gjallë dhe mikpritëse.
Organizatorët e ngjarjes theksojnë se përveç ekspozimit të librave, Panairi do të ofrojë edhe aktivitete shoqëruese, si promovime librash, nënshkrime nga autorë të njohur dhe diskutime mbi zhvillimet më të fundit në fushën e botimeve dhe letërsisë në rajon.
Ulqini, me traditën e tij kulturore dhe frymën e hapur ndaj artit e dijes, mbetet vendi ideal për të kremtuar librin si urë komunikimi ndërmjet njerëzve dhe kulturave. Prandaj, të gjithë adhuruesit e librit, vendas dhe të huaj, janë të mirëpritur të bëhen pjesë e kësaj ngjarjeje të rëndësishme kulturore.
