Komisioni disiplinor i Federatës së futbollit të Malit të Zi në mbledhjen e ditës së enjte ashtu edhe siç pritej ka dënuar rëndë klubin e futbollit Otrant Olimpik nga qyteti i Ulqinit. Kështu pas lëshimit të bërë nga ulqinakët dhe aktivizimit në ndeshjen e fundit kampionale kundër Ibrit në Rozhajë të lojtarit Joko Jabuçanin i cili ishtë në regjistrim të dyfishtë në dy ekipe, Llovqen dhe Otrant Olimpik, dhe i cili nuk kishte të drejtë loje, ulqinakët humbin ndeshjen në tavolinë me rezultatin 3:0.
Humbja në tavolinë nga rivali kryesor për kreun e renditjes Ibri nga Rozhaja, rival të cilin djemtë nga Ulqini e mundën në fushën e gjelbër, ka bërë që diferenca në mes tyre tani të jetë plot 9 pikë. Para ulqinakëve në tabelen e klasifikimit është edhe Komi me 6 pikë diferencë.
Por e keqja për ulqinakët nuk mbaron këtu. Komisioni disiplinor ka vendosur që të nis procedurat disiplinore kundër Otrant Olimpikut dhe lojtarit Joko Jabuçanin. Përveç tre pikëve tashmë të marra Otrant Olimpik rrezikon të dënohet me marrje tjera të pikëve.
Rasti më i fundit ka hapur polemika të mëdha në mes të dashamirësve të sportit të qytetit të Ulqinit dhe zhgënjimi i tyre është shumë i madh.
