Në Komunën e Ulqinit u mbajt sot një takim i rëndësishëm kushtuar përmirësimit të infrastrukturës atletike, me synimin që qyteti të shndërrohet në një qendër të rëndësishme të atletikës në Mal të Zi.
Në takim morën pjesë Kryetari i Komunës së Ulqinit, Genci Nimanbegu, Sekretarja e Sekretariatit për Sport dhe të Rinj, Enisa Martinović, këshilltari i kryetarit Asllan Llunji, arkitekti kryesor i qytetit Mehmet Milla, si dhe përfaqësues të Federatës së Atletikës së Malit të Zi: Milorad Vuletić, kryetar i Federatës, Milan Madžgalj, sekretar i përgjithshëm dhe Ljubiša Marović, kryetar i Klubit Atletik “Orion” nga Ulqini.
Fokusi kryesor i bisedimeve ishte pista atletike në Ulqin dhe mundësia e adaptimit të infrastrukturës ekzistuese në përputhje me standardet evropiane, në mënyrë që sportistëve t’u sigurohen kushte cilësore për stërvitje, përgatitje dhe zhvillim garash.
Kryetari i Komunës, Genci Nimanbegu, theksoi se administrata lokale është e gatshme të mbështesë këtë projekt, duke nënvizuar se Ulqini prej vitesh është i njohur si destinacion për përgatitje dimërore të shumë klubeve dhe atletëve, çka krijon një bazë reale për zhvillimin e mëtejshëm të atletikës në qytet.
Nga ana tjetër, përfaqësuesit e Federatës së Atletikës së Malit të Zi prezantuan standardet që duhet të plotësojnë pistat moderne atletike dhe shprehën kënaqësinë për iniciativën e Komunës së Ulqinit, duke konfirmuar gatishmërinë e Federatës për të ofruar mbështetje profesionale në realizimin e projektit.
Në përfundim të takimit u dakordua që në periudhën e ardhshme të përcaktohen hapat konkretë dhe zgjidhjet teknike, me qëllim që Ulqini të pajiset me një pistë moderne atletike, në dobi të sportistëve, të rinjve dhe zhvillimit të turizmit sportiv.
