Kryetari i Komunës së Ulqinit Loro Nrekiqi u jep dorën në kuvend të gjithë këshiltarëve, por harron gazetarët
Shkruan Gjekë Gjonaj
Kryetari i Komunës së Ulqinit Loro Nrkeiqi, edhe sot sikur dje, ishte i pranishëm në seancën e Kuvendit të Komunës së Ulqinit. Për dallim nga dita e djeshme kryetari Nrekiq, në momentin e hyrjes së tij në sallën e parlamentit vendor, në atmosferë pune, bëri një veprim të pazakontë dhe të paparë ndonjëherë në jetën e pluralizmit politik në Kuvendin e Ulqinit .
Nrekiqi , para se të ulej në rendin e parë të ulëseve në kuvend, shfrytëzoi rastin që t’u japë dorën secilit këshilltarë veç e veç. U tregua shumë i vëmendshëm dhe i kujdesshëm ndaj çdo këshilltari të cilit me buzëqeshje i shtrëngoi dorën.
Ky gjest simpatik u mirëpritë dhe për momentin shkaktoi relaks në parlamentin e Ulqinit, edhe pse harroi pa ua dhënë dorën gazetarëve të pranishëm në kuvend. Megjithatë, kjo nuk e ka zbehur këtë gjest të kryetarit Nrekiq, i cili po të krahasohet me të kaluarën nga tradita e shqiptarëve do të mund të vlerësohet si mjaft burrëror, njerëzor e fisnik.
