Në përmbushje të amanetit të tij të fundit, albanologu kanadez, Robert Elsie është varrosur në mes të Alpeve të Shqipërisë, në fshatin turistik të Thethit, të cilit i kushtoi edhe një nga librat e tij të shumtë, duke dëshmuar për herë të fundit lidhjen e tij të fortë, gati 40 vjeçare, me Shqipërinë dhe shqiptarët, raporton “Zëri i Amerikës”.
Në varrimin e tij kanë marrë pjesë personalitete nga Shqipëria dhe Kosova, përcjell albinfo.ch.
Ai kishte lindur në vitin 1950 në Vankuver të Kanadasë. Robert Elsie ishte albanolog, shkrimtar dhe përkthyes.
Që nga 1978 pati mundësi të vizitojë Shqipërinë disa herë në kuadrin e ‘takimeve shkencore’ midis Institutit të Gjuhësisë së Universitetit të Bonit dhe Akademisë së Shkencave të Shqipërisë.
Gjithashtu mori pjesë disa vite me radhë në Seminarin Ndërkombëtar për Gjuhën, Letërsinë dhe Kulturën Shqiptare në Kosovë.
Pas studimeve universitare ai punoi për Ministrinë e Punëve të Jashtme gjermane në Bon dhe nga 2002 deri 2013 për Tribunalin e Hagës.
Ishte anëtar i Shoqatës së Evropës Juglindore (Südosteuropa-Gesellschaft), anëtar i Akademisë së Shkencave dhe të Arteve të Kosovës, si dhe anëtar nderi i Shoqatës së Shkrimtarëve të Kosovës.
U nda nga jeta më 2 tetor 2017, duke lënë amanet që të prehej në Shqipëri.
